Ordu.az xəbər verir ki, bu barədə “Al Hadath” məlumat yayıb.

İştirakçılar İranı səhv hesablamalarını yenidən nəzərdən keçirməyə çağırıb və vurğulayıblar ki, qonşuluq və dövlət suverenliyi prinsiplərinin davamlı şəkildə pozulması həm İranın, həm də regionun təhlükəsizliyinə ciddi təsir göstərəcək və region ölkələri bu təhdidlərə qarşı laqeyd qalmayacaq.

Bildirilib ki, İran dərhal bütün hücumları dayandırmalı, qonşu ölkələrə qarşı hər hansı təxribat və təhdidlərdən çəkinməli, həmçinin ərəb ölkələrində fəaliyyət göstərən silahlı qruplara dəstək, maliyyə və silah təminatını dayandırmalıdır.

İştirakçılar İranın İordaniya, Azərbaycan və Türkiyəyə qarşı hücumlarını müzakirə edib və bu hücumları qəti şəkildə pislədiklərini bir daha bəyan ediblər.

Onlar qeyd ediblər ki, bu cür hücumlara heç bir bəraət qazandırmaq mümkün deyil və dövlətlərin özünümüdafiə hüququ vurğulanıb.

Bundan əlavə, İranın Hörmüz boğazında beynəlxalq gəmiçiliyi məhdudlaşdırmaq və ya Bab əl-Məndəb boğazında dəniz təhlükəsizliyini təhdid etmək cəhdlərindən çəkinməsinin vacibliyi qeyd olunub.

İştirakçılar həmçinin Livanın təhlükəsizliyinə, sabitliyinə və ərazi bütövlüyünə dəstəklərini ifadə edib, Livan hökumətinin silahların yalnız dövlət nəzarətində olması ilə bağlı qərarını dəstəkləyib və İsrailin Livana qarşı hərəkətlərini pisləyiblər.

Sonda qeyd olunub ki, iştirakçılar vəziyyəti izləmək, yeni şəraiti qiymətləndirmək və öz təhlükəsizliklərini qorumaq üçün birgə addımlar atmaq məqsədilə məsləhətləşmələri davam etdirəcəklər.

Sevinc Əliyeva
Ordu.az