Ordu.az xəbər verir ki, bu barədə “Reuters” agentliyi məlumat yayıb.

Bildirilib ki, Oman vasitəçiliyi ilə Vaşinqton və Tehran arasında aparılan nüvə danışıqları fonunda həyata keçirilən bu hücumlar son onilliklərdə İrana qarşı ən ciddi hücum hesab olunur. Bu, uzunmüddətli “kölgə müharibəsi” və 2025-ci ilin iyun ayında baş vermiş 12 günlük müharibədən sonra baş verib.

Məlumata görə, hücumlar Yaxın Şərqdə genişlənərək enerji bazarlarına və nəqliyyat marşrutlarına təsir göstərib.

Öldürülən əsas fiqurlar arasında:


İranın ali dini lideri Ayətullah Əli Xameneyi 1989-cu ildən bu vəzifədə idi və 86 yaşında fevralın 28-də Tehranda yerləşən iqamətgahına endirilən hava zərbəsi nəticəsində öldürülüb. Onun hakimiyyəti dövründə təhlükəsizlik strukturları vasitəsilə güc möhkəmləndirilib və İranın regional təsiri genişləndirilib.


Ali Milli Təhlükəsizlik Şurasının katibi Əli Laricani martın 17-də Tehranın Pərdis bölgəsinə endirilən hava zərbəsi zamanı oğlu və müavinlərindən biri ilə birlikdə həlak olub. O, həmçinin nüvə danışıqlarında iştirak etmiş və ali liderin yaxın müşavirlərindən biri olub.


Əli Şamxani fevralın 28-də Tehrana endirilən zərbələr nəticəsində öldürülüb. O, İranın təhlükəsizlik və nüvə siyasətində əsas fiqurlardan biri hesab olunurdu.


İslam İnqilabı Keşikçiləri Korpusunun komandanı Məhəmməd Pakpur fevralın 28-də baş verən hücumlar zamanı həlak olub. O, daha əvvəl öldürülmüş Hüseyn Səlaminin yerinə bu vəzifəyə təyin edilmişdi.


İranın müdafiə naziri Əziz Nəsirzadə də fevralın 28-də yüksək rəhbərliyə qarşı həyata keçirilən zərbələr zamanı öldürülüb. O, hərbi planlaşdırmada mühüm rol oynayırdı.


Silahlı Qüvvələrin Baş Qərargah rəisi Əbdülrəhim Musəvi fevralın 28-də keçirilən yüksək səviyyəli toplantı zamanı həlak olub. O, İran ordusunun müxtəlif qüvvələrinin koordinasiyasına cavabdeh idi.


“Bəsic” qüvvələrinin komandanı Qulamrza Süleymani martın 17-də endirilən zərbələr nəticəsində öldürülüb. Bu qüvvə daxili təhlükəsizliyin təmin edilməsində mühüm rol oynayırdı.

Bundan əlavə, bir sıra yüksək rütbəli hərbi və kəşfiyyat rəsmilərinin də xüsusilə fevralın 28-də keçirilən ilk hücum zamanı öldürüldüyü bildirilir.

Sevinc Əliyeva
Ordu.az