Ordu.az xəbər verir ki, bu barədə Ermənistanın “168.am” nəşri yazıb.

Nəşr Ermənistan Xarici Kəşfiyyat Xidmətinin bəyanatını sitat gətirərək qeyd edib: “Xarici Kəşfiyyat Xidməti kəşfiyyat məlumatları əldə edir ki, başqa ölkədə həmin ölkənin xüsusi xidmət orqanlarının adından çıxış edən müxtəlif aktorlar erməni əsilli və Ermənistan vətəndaşı olan, həmin ölkədə iqtisadi fəaliyyətlə məşğul olan şəxslərə təzyiq göstərməyə çalışırlar. Məqsəd isə onları Ermənistanda keçiriləcək parlament seçkilərində iştirak üçün müraciət etmiş bəzi siyasi qüvvələrə dəstək verməyə yönəlmiş hərəkətlərə sövq etməkdir. Bu hərəkətlərə, lakin bununla məhdudlaşmadan, qeyd olunan sahibkarlar tərəfindən həmin siyasi qüvvələrə maliyyə və təşkilati xarakterli dəstəyin göstərilməsi də daxildir”.

Məqalədə qeyd olunub ki, Kristine Qriqoryanın rəhbərlik etdiyi qurum faktlar təqdim etmir, konkret hansı ölkədən söhbət getdiyini açıqlamır və bəyanatda qeyd olunan hərəkətlərdən başqa hansı addımların atıldığını da dəqiqləşdirmir, halbuki deyilir ki, bunlar “həmin siyasi qüvvələrə qeyd olunan sahibkarlar tərəfindən maliyyə və təşkilati dəstək göstərilməsi ilə məhdudlaşmır”.

KİV xatırladıb ki, başqa ölkədə Ermənistan vətəndaşlarına təzyiqlər və seçki prosesinə müdaxilə ilə bağlı məlumat əsasında Daxili İşlər Nazirliyinin polisi İstintaq Komitəsinə müraciət təqdim edib və hazırda həmin müraciət araşdırma mərhələsindədir.

“Xarici Kəşfiyyat Xidmətinin bu seçkiqabağı xəbərdarlığı, 2025 və 2026-cı illərə dair hesabatların hibrid təzyiqlər kontekstində əsas vurğularını nəzərə alsaq, əslində heç bir təəccüb doğurmur”, - deyə “168.am” yazıb.

Nəşr mövzudan bir qədər kənara çıxaraq xatırladıb ki, 2024-cü ilin yazında parlament-hökumət sual-cavabı zamanı Nikol Paşinyan belə demişdi: “2020-ci ilin 44 günlük müharibəsinə hazırlıq prosesində bizim müttəfiqlərimizdən də iştirak edənlər olub. Mən Kollektiv Təhlükəsizlik Müqaviləsi Təşkilatına üzv olan ən azı iki ölkə tanıyıram ki, bizim əleyhimizə müharibənin hazırlanmasında iştirak edib”.

“168.am” dərhal yazmışdı ki, Paşinyan burada Rusiya və Belarusu nəzərdə tutur. Bu gün Paşinyan həmin ölkələri əsasən daxili siyasi müstəvidə xatırlayır və parlament seçkilərində iştirak üçün müraciət etmiş konkret namizədlərin xarici siyasi əlaqələrini vurğulayır”, - deyə məqalədə qeyd olunub.

Müəllifin sözlərinə görə, həmin bəyanatın səsləndirildiyi dövrdə jurnalistlər Ermənistanın Xarici Kəşfiyyat Xidmətinin rəhbəri Kristine Qriqoryandan soruşmağa çalışmışdılar ki, bu sadəcə siyasi bəyanat idi, yoxsa KTMT-nin iki ölkəsi ilə bağlı əməliyyat məlumatları var?

“Lakin Qriqoryan hər hansı şərh verməkdən imtina etmiş və demişdi: “Ermənistanın baş naziri bəyanat verib və mən hər hansı şərh verə bilmərəm”. Daha sonra o əlavə etmişdi ki, Ermənistanın suverenliyi üçün bir neçə ölkədən gələn çoxsaylı təhlükələr mövcuddur. Lakin Qriqoryan konkret adlar çəkməmişdi.

“Bu təhlükələri neytrallaşdırmaq üçün Ermənistanın təhlükəsizlik sahəsində islahatlar həyata keçirilir. Fəaliyyətimizin prioritetləri çərçivəsində xidmətin toplamalı olduğu kəşfiyyat məlumatlarının istiqamətləri müəyyən edilib. Bu məlumatlar respublikanın müxtəlif ölkələrdən və müxtəlif hadisələrdən qaynaqlanan xarici təhlükələrini neytrallaşdırmağa yönəlib. Kəşfiyyat məlumatlarımız və təhlillərimiz siyasi qərarların möhkəm informasiya bazasına əsaslanmasını təmin etməyə yönəlib”, - deyə Qriqoryan qeyd etmişdi.

O əlavə etmişdi ki, bütün ölkələrdə xarici təhlükəsizlik çağırışlarının həm daxili, həm də xarici aktorları olur və Ermənistan da istisna deyil”, - deyə KİV qeyd edib.

Bu kontekstdə “168.am” əlavə edib ki, hələ ötən il “Milli təhlükəsizlik orqanları haqqında” qanuna dəyişiklik və əlavələr edilməsi təşəbbüsü irəli sürülmüşdü.

“Bu təşəbbüsə əsasən xüsusilə aşağıdakılar təklif olunurdu:

milli təhlükəsizlik orqanlarının xarici əks-kəşfiyyat fəaliyyəti həyata keçirməsi funksiyasını təsbit etmək,
xarici dövlətlərdə Ermənistanın diplomatik xidmət orqanlarında dövlət təhlükəsizliyinin təmin edilməsinin zəruriliyini milli təhlükəsizlik orqanlarının əks-kəşfiyyat fəaliyyətinin əsaslarından biri kimi müəyyən etmək,
kəşfiyyat və əks-kəşfiyyat orqanlarının əməkdaşlıq qaydalarının müəyyən edilməsini Ermənistanın baş nazirinin səlahiyyətinə vermək,
milli təhlükəsizlik orqanlarına dövlət və yerli özünüidarəetmə orqanlarının, təşkilatların fəaliyyətləri üçün zəruri olan informasiya sistemlərinə və məlumat bazalarına, o cümlədən onlayn formatda çıxış əldə etmək səlahiyyəti vermək,
Milli Təhlükəsizlik Xidmətinin kəşfiyyat bölmələri ilə bağlı hüquqi tənzimləməni qüvvədən salmaq.

Hansı konkret ölkələrdə və hansı səbəbdən hakimiyyət xarici dövlətlərdə Ermənistan diplomatik xidmət orqanlarında dövlət təhlükəsizliyinin təmin edilməsini zəruri hesab edib, məlum deyil. Maraqlıdır ki, Kristine Qriqoryanın rəhbərlik etdiyi qurumun kəşfiyyat məlumatları nə dərəcədə mötəbərdir ki, seçkiqabağı məntiqə əsaslanaraq başqa ölkədə həmin ölkənin xüsusi xidmət orqanlarının adından çıxış edən müxtəlif aktorların erməni əsilli və Ermənistan vətəndaşı olan, həmin ölkədə iqtisadi fəaliyyətlə məşğul olan şəxslərə təzyiq göstərdiyini iddia edir. Həm də sual yaranır: bu cür məlumatların mənbəyi kim və ya haradandır?” - deyə nəşr vurğulayıb.

KİV seçkilər mövzusuna toxunaraq yazıb ki, hakimiyyətə yaxın dairələrdə guya seçkilərdən əvvəl Rusiyadan seçicilərin böyük axınının gözlənildiyi barədə məlumat yayılır.

“Guya siyasi qüvvələrdən birinin nümayəndələri artıq avtobus və mikroavtobusların sifarişinə başlayıblar və hüquq-mühafizə orqanları bunu dayandırmalıdır. Əgər Ermənistan vətəndaşı, məsələn, işləmək üçün xaricə gedibsə və səsvermə üçün geri qayıdırsa, bunda nə problem var, əgər məcburiyyət yoxdursa və ya bu, süni şəkildə təşkil edilməyibsə, problem nədir?” - deyə müəllif sual verib.

Məqalədə qeyd olunub ki, 2021-ci ilin iyulunda keçirilən növbədənkənar parlament seçkilərindən sonra Nikol Paşinyan bəyan etmişdi ki, onun “Vətəndaş Müqaviləsi” partiyası seçkilərdə Ermənistan vətəndaşlarından Ermənistan üçün sülh və inkişaf dövrü açmaq mandatı alıb.

“Həmin vaxt “168.am” yazmışdı ki, necə ola bilər ki, Ermənistan vətəndaşlarından “Qarabağ” (ləğv edilmiş qondarma qurum-red.) üçün sülh və inkişaf dövrü açmaq mandatı alınsın, halbuki müharibədən əvvəl Paşinyan dəfələrlə bəyan etmişdi ki, Qarabağ məsələsini həll etmək üçün “Qarabağ”dan mandat və səlahiyyət almayıb, çünki onlar Ermənistan seçkilərində iştirak etmirlər və buna görə də o yalnız Ermənistanı təmsil edə bilər”, - deyə nəşr xatırladıb.

KİV sual verib ki, Qarabağdan (könüllü-red.) köç etmiş şəxslər Paşinyanı seçmişdilər və ona öz gələcəklərini yenidən müəyyən etmək hüququ vermişdilərmi, yoxsa çox sürətlə hansısa sənəd məsələləri həll edilmişdi?

“Yeri gəlmişkən, belə məlumatlar da yayılırdı. Maraqlıdır, hətta bu məlumatlar onların xeyrinə olsa belə, Ermənistan hakimiyyəti onların izinə düşmüşdümü? İndi Qarabağdan köç etmiş şəxslərin Ermənistanda yerləşdirilməsinin Ermənistan hakimiyyətinin maraqlarına nə dərəcədə uyğun olub-olmadığını da anlamaq lazımdır.

Seçkilərə təxminən iki ay qalıb və hələ çox şey “su üzünə çıxacaq”. Xarici Kəşfiyyat Xidməti isə mövcud şəraitdə xarici təhlükəsizlik risklərinin qarşısının alınmasını unutmamalı və yalnız hesabatın hansısa hissəsini buna həsr etməklə kifayətlənməməlidir”, - deyə “168.am” yekunlaşdırıb.

Alpər Mövludoğlu
Ordu.az