Ordu.az xəbər verir ki, bu barədə Ermənistanın “168.am” nəşri “Respublikadan “kiçik modul dövlətə” başlıqlı məqaləsində yazıb.

Nəşr qeyd edib ki, bu sadə insanların və qrupların primitiv şəkildə ayrılması xəttindən çıxaraq ictimai-siyasi düşüncəyə, dünyagörüşünə qədər yayılıb.

“Qara-ağ” şərti qarşıdurması istənilən ziddiyyətli və ikili düşüncə tərzinin təzahürünə tətbiq oluna bilər. Bu yanaşma hər hansı aralıq rəngi və çaları istisna edir. Onun əsas xüsusiyyəti səthiliyidir ki, bu da xeyir və şər, xilaskarlıq və məhvolma, işıqlanma və qaranlıq, vətənpərvərlik və xəyanət kimi primitiv qarşıdurma formalarında özünü göstərə bilər.

Bu ikili düşüncə deformasiyası bütün çılpaqlığı ilə ABŞ-nin vitse-prezidenti Cey Di Vensin səfəri ərəfəsində özünü göstərdi. Ermənistanın siyasi meydanı iki böyük qütbə bölündü: hakimiyyət və onun peyk qüvvələri bunu xilaskar gəliş kimi təqdim edirdi, müxalifətin bir hissəsi isə yaxınlaşan fəlakət barədə xəbərdarlıq edirdi.

Vətəndaşlar da öz siyasi simpatiyalarına uyğun olaraq Vensin səfərini ya xilas mayakı, ya da ölümcül siqnal kimi qiymətləndirirdilər.

Lakin bu cür ikili ölçü təkcə siyasətin, xüsusilə də geosiyasətin deyil, ümumiyyətlə insan həyatının məntiqinə ziddir. Qütblər arasında, bir qayda olaraq, həyat olmur, necə ki, iki zidd qütbün ortasında siyasət də mövcud ola bilməz”, - deyə nəşr qeyd edib.

KİV-ə görə, reallıq isə ondan ibarətdir ki, Vensin səfəri ondan əvvəl və sonra baş verən, eləcə də baş verə biləcək çoxsaylı proseslərin təsiri ilə Ermənistan üçün siyasi, geosiyasi, iqtisadi və digər nəticələr doğura bilər.

“Bu nəticələr həm imkanlar, həm də risklər ehtiva edir. Nə hakimiyyətin təbliğat xarakterli ifrat sevinci, nə də müxalifətin müəyyən təbəqələrinin apokaliptik reaksiyaları reallıqla səsləşir.

Eyni model əks halda da işləyə və işləyir. Məsələn, Ermənistana hər hansı rusiyalı yüksək vəzifəli şəxs gəldikdə, müxalifətin müəyyən dairələrində xilaskar ümidləri yaranır, hakimiyyətə yaxın təbliğatçılar isə fəlakət siqnalları səsləndirirlər. İkili və zidd ölçülər üzərində qurulmuş Ermənistanın siyasi sisteminin bu həddindən artıq sadəliyi faktiki olaraq siyasi düşüncənin mövcudluğunu istisna edir”, - deyə nəşr bildirib.

Müəllifin sözlərinə görə, bu o demək deyil ki, Ermənistanda siyasi fikir yoxdur.

“Sadəcə, real siyasi düşüncənin nadir təzahürləri bir ifratdan digərinə yellənən bu ikili mexanizmin “kəfgir” effekti içərisində boğulur. Halbuki siyasi düşüncə olmadan siyasi sistem formalaşa bilməz. Hakim olan bu primitiv ikili düşüncə və son günlərin dəbdə olan trendi nəticəsində ölkə “kiçik modul dövlət”ə çevrilə bilər. Eyni zamanda, onu bu vəziyyətə gətirənlər bunu vətəndaşlara çəhrayı gələcək kimi təqdim edərək öz hakimiyyətlərini qorumaq üçün yaranmış maliyyə və siyasi borclarını vətəndaşların hesabına bağlamağa zəmanət verən qara perspektiv yarada bilərlər”, - deyə nəşr bildirib.

Alpər Mövludoğlu
Ordu.az