Britaniya istehsalı olan yeni ramjet mühərrikli artilleriya mərmisi böyük maraq doğurur. “Tiberius Aerospace” tərəfindən hazırlanan bu 155 mm-lik, uzadılmış mənzilli, dəqiq idarə olunan, maye yanacaqlı, ramjet mühərrikli artilleriya mərmisi Mach 3.5 sürətinə və təxminən 65 min fut (təxminən 20 km) hündürlüyə çata bilir.

Əgər bu sistem etibarlı və əlçatan şəkildə istehsal oluna bilsə – Qərbin müdafiə sənayesinin zəif vəziyyətini nəzərə alsaq, bu, böyük bir tələbatdır – o zaman Qərb qüvvələri üçün inqilabi bir həll olacaq.

Britaniyanın “Sceptre” Mərmisi Haqqında

“Tiberius Aerospace” bu yeni 155 mm-lik, uzadılmış mənzilli artilleriya mərmisinə “Sceptre” (TRBM 155HG) adını verib. O, üç gün əvvəl Londonda keçirilən “Future Artillery Conference” tədbirində təqdim edilib. “Tiberius” bu sistemi NATO ilə uyğun olan, xüsusilə də NATO-nun mövcud 155 mm-lik haubitsaları ilə işləyən bir həll kimi reklam edir.

Bu, aydın şəkildə, Britaniya və Avropanın ümumi səylərinin bir hissəsidir: regionun ordularını daha müstəqil və qabiliyyətli etmək, yəni militarizasiya istiqamətində atılmış bir addımdır. Uzun illər ərzində onlar öz yerli hərbi imkanlarına laqeyd yanaşaraq, təhlükəsizliklərini ABŞ və onun genişlənmiş müdafiə çətirinə həvalə etmişdilər və nəticədə Britaniya və Avropa imkanları zəifləmişdi. Lakin indi, Tramp administrasiyası Avropanın müdafiəsi məsələsində ciddi şübhələr ifadə etdikdən və Ukraynaya dəstəyi azaltdıqdan sonra, avropalılar haqlı olaraq qərara gəliblər ki, artıq öz çəkilərini özləri daşımalıdırlar. Avropa və Britaniyanın müdafiə sənayesinin yenidən dirçəldilməsi bunun ən etibarlı yoludur və görünür ki, “Sceptre TRBM 155HG” Britaniyanın bu istiqamətdə ilk addımıdır.

“Army Recognition” müdafiə nəşri qeyd edir ki, “Sceptre”nin debütü əhəmiyyətlidir, çünki o, NATO standartlı haubitsalar üçün mövcud sistemlərin qiymətinin bir hissəsinə dağıdıcı həll təklif edir. Ümumiyyətlə, müasir müharibə getdikcə “overthe-horizon” (üfüqdən o yana) aparılır. Effektiv silah sistemləri isə bu səbəbdən daha uzağa və daha sürətli uçmalı, həm də daha dəqiq olmalıdır.

Ramjet Mühərriki – Ən Unikal Element

Bu yeni mərminin ən unikal elementi ramjet mühərrikidir. Ramjet – hərəkət edən hissələri olmayan, daxil olan havanı mərminin yüksək sürətindən istifadə edərək sıxışdıran hava nəfəsli mühərrikdir. Bu, yanmanın davamlı olmasını və uçuş boyunca fasiləsiz itələmə qüvvəsi yaranmasını təmin edir. Yüksək sürəti və böyük uçuş hündürlüyü sayəsində “Sceptre” GPS siqnallarının pozulmasına digər daha yavaş və alçaqdan uçan raketlər qədər həssas deyil.

Britaniya Üçün Dərin Atəş İmkanları və Yeni Dövr

Bu sistem Britaniya ordusuna dərin atəş imkanlarında geniş seçimlər verir ki, bu da Ukraynada istənilən hərbi qarşıdurmanın əsas aspektidir və şübhəsiz ki, silah məhz bu məqsəd üçün hazırlanır. Şayiələrə görə, Londonun Starmer administrasiyası fransızlar və digər Avropa NATO üzvləri ilə birlikdə Ukraynaya – bəlkə də Dnepr çayına qədər – ekspedisiya qüvvəsi göndərmək niyyətindədir.

Britaniya uzun illərdir ki, ABŞ, Rusiya və Çinlə müqayisədə uzun mənzilli dəqiq atəş və avtomatlaşdırılmış sistemlərə əsaslanan müasir hərb inqilabında geri qalıb. “Sceptre” isə bütün bu elementləri birləşdirir. Bu da o deməkdir ki, London özünü hazırda davam edən qlobal qarşıdurmada daha böyük rol oynamağa hazırlayır.

Dəyanət Ağalarlı
Ordu.az