Müdafiə Nazirliyinin mətbuat xidmətindən Ordu.az verilən məlumata görə, 1992-ci ilin iyununda Azərbaycan Respublikasının ərazi bütövlüyü uğrunda gedən döyüşlərdə həlak olan Milli Qəhrəman A.Davidoviçin qəbri ziyarət edildikdən sonra onun ailə üzvlərinin iştirakı ilə anım mərasimi keçirilib.

“Azərbaycan dövləti, xalqı və Müdafiə Nazirliyinin rəhbərliyi qəhrəmanımızı əsla unutmayıb. Onun xatirəsi daim ehtiramla yad olunaraq xalqımızın yaddaşında əbədi qalacaq. Oğlunuzun qəhrəmanlığı dövlətimiz tərəfindən yüksək qiymətləndirilib və ona Azərbaycanın Milli Qəhrəmanı adı verilib. Azərbaycan torpağı onun ikinci vətəninə çevrilib. A.Davidoviç qəhrəmanlığı ilə Azərbaycan və Belarus xalqları arasında olan dostluğu, qardaşlığı daha da möhkəmləndirdi. O, çətin bir zamanda Azərbaycan xalqının taleyinə biganə qalmayaraq azərbaycanlı qardaşları ilə birlikdə mənfur düşmənə qarşı vuruşaraq qəhrəmanlıq göstərib. A.Davidoviç zabit borcunu şərəflə yerinə yetirib”, - deyə Azərbaycanın Belarusdakı hərbi attaşesi qəhrəmanın anasına müraciət edərək bildirib.

Mərasimin sonunda Milli Qəhrəmanın ailəsinə Müdafiə naziri adından hədiyyələr və Novruz sovqatı təqdim olunub.




Ordu.az