Ordu.az xəbər verir ki, bu razılaşma HÜRJET platforması üçün mühüm mərhələ hesab olunur və proqramın təsir dairəsinin genişləndirilməsi, eləcə də gələcək variantlarının hazırlanması prosesində texniki və əməliyyat dəstəyinin davamlılığını təmin edir.
Eyni zamanda, bu əməkdaşlıq GE “Aerospace” şirkətinin qabaqcıl hərbi aviasiya proqramları üçün etibarlı güc sistemi tərəfdaşı rolunu daha da gücləndirir.
TUSAŞ baş direktoru Mehmet Demiroğlu bildirib: “HÜRJET reaktiv təlim təyyarəsi TUSAŞ-ın aviasiya və müdafiə sahəsində gələcək inkişafı üçün mühüm mərhələdir və bu razılaşma proqram üçün kritik dönüş nöqtəsidir. GE “Aerospace” ilə uzunmüddətli əməkdaşlığımız HÜRJET-in müasir, etibarlı və qlobal rəqabətə davamlı təlim platforması kimi uğurunu təmin edir”.
GE “Aerospace” şirkətinin müdafiə və sistemlər üzrə qlobal satış və biznesin inkişafı üzrə vitse-prezidenti Rita Flaherty isə qeyd edib: “TUSAŞ-ın bizə göstərdiyi etimad və HÜRJET proqramının artan dinamizmi qürurvericidir. Biz Türkiyənin müdafiə və aviasiya ekosistemində mühüm rol oynamağa davam edəcəyik”.
HÜRJET platforması dünya üzrə geniş istifadə olunan, döyüş şəraitində özünü sübut etmiş və yüksək etibarlılığa malik GE “Aerospace” F404 mühərriki ilə təchiz olunur.
Təyyarə qabaqcıl avionik, yüksək performans və yeni nəsil həllər təqdim edərək müasir təlim tələblərinə cavab vermək üçün hazırlanıb.
F404 mühərriki ilə təchiz olunan təyyarələrin 16 ölkənin arsenalında olması bu mühərrikin qlobal miqyasda etibarlı seçim olduğunu göstərir.
1985-ci ildə GE “Aerospace” və TUSAŞ tərəfindən yaradılmış birgə müəssisə olan TEI (TUSAŞ Mühərrik Sənayesi AŞ) regionun ən uğurlu aviasiya tərəfdaşlıqlarından biri hesab olunur.
Bu əməkdaşlıq çərçivəsində TUSAŞ HÜRJET-in rəqabətqabiliyyətli reaktiv təlim təyyarəsinə çevrilməsində əsas rol oynayıb.
2024-cü ildə keçirilən Farnborough Airshow və 2025-ci ildə keçirilən IDEF sərgilərində imzalanan razılaşmalar bu əməkdaşlığın inkişafına zəmin yaradıb.
GE “Aerospace” ilə TUSAŞ arasında təxminən 40 illik strateji tərəfdaşlıq mövcuddur və bu əməkdaşlıq F-16 qırıcılarını gücləndirən F110 mühərriklərindən başlayaraq KAAN və HÜRJET kimi proqramları əhatə edir.
Sevinc Əliyeva
Ordu.az
