Ordu.az xəbər verir ki, Mirzoyan bu fikirləri 2026-cı il mayın 5-də “İrəvan dialoqu-2026” beynəlxalq konfransında çıxışı zamanı səsləndirib.
“Biz sülhü birdəfəlik nailiyyət kimi qəbul etməməliyik. Sülh davamlı diqqət və qayğı tələb edir. Əgər ona sərmayə qoyulmasa, onu itirmək riski yaranır. Deməli, sülh hadisə deyil, davamlı fəaliyyətdir. Bu isə humanitar məsələlərin həllini də əhatə edir və etimadın bərpasına, cəmiyyətlər arasında real barışığa töhfə verir.
Lakin sülhün qorunması üçün təkcə diplomatiya kifayət deyil. Ticarət yollarını, enerji şəbəkələrini, boru kəmərlərini və rəqəmsal əlaqələri birlikdə istifadə etdikdə həm riskləri, həm də faydaları bölüşürük.
Beləliklə, qonşularımızla birlikdə şərq ilə qərbi, şimal ilə cənubu birləşdirən infrastruktur quraraq regionda hər bir iştirakçının qonşusunun sabitliyində maraqlı olduğu bir reallıq yaradırıq. Bu, “Sülh kəsişməsi” təşəbbüsünün və TRIPP layihəsinin (hər ikisi Zəngəzur dəhlizi-red.) əsasını təşkil edir. Sülhə, əməkdaşlığa və rifaha sadiqlik qonşularımıza münasibətdə yanaşmamızı müəyyən edir.
Türkiyə ilə münasibətlərin normallaşdırılması prosesi açıq sərhədlərin və mehriban qonşuluq münasibətlərinin ölkəmizin maraqlarına xidmət edəcəyinə dair inamımızı əks etdirir. Gürcüstan ilə strateji tərəfdaşlığımızı davam etdiririk və bu da qarşılıqlı maraqlara əsaslanır. İran ilə isə daim dostluq münasibətləri və sıx tərəfdaşlıq saxlamışıq”, - deyə Ermənistanın XİN rəhbəri bildirib.
O qeyd edib ki, Ermənistan balanslaşdırılmış xarici siyasət istiqamətində suveren seçim edib.
“Bu siyasət bir mərkəzdən asılılıq deyil, çoxşaxəli və qarşılıqlı faydalı tərəfdaşlıqlar üzərində qurulub. Bu gün Ermənistanın strateji tərəfdaşları sırasında ABŞ, Fransa, Qazaxıstan, Çin və Avropa ölkələrinin sayı artan tərəfdaşlar yer alır və onlar alternativ deyil, bir-birini tamamlayan istiqamətlərdir.
Bu transformasiya xüsusilə Avropa İttifaqı ilə münasibətlərdə daha aydın görünür. 2025-ci ilin dekabrında qəbul edilən strateji gündəlik siyasi, iqtisadi və təhlükəsizlik sahələrində əməkdaşlıq üçün zəmin yaradır. Viza rejiminin liberallaşdırılması üzrə dialoqun başlanması yalnız hökumətlər üçün deyil, Ermənistan vətəndaşlarının gündəlik həyatı üçün də mühüm imkanlar açır.
Fırtınalar heç vaxt tam nəzarət altına alına bilməz, yeni qeyri-müəyyənliklər həmişə meydana çıxacaq. Lakin bizim təcrübəmiz göstərir ki, seçim azadlığı və düzgün strategiya sayəsində kiçik dövlətlər belə öz yolunu taparaq suveren, sülh və rifah içində gələcək qura bilər”, - deyə Mirzoyan bildirib.
Alpər Mövludoğlu
Ordu.az
