Ordu.az xəbər verir ki, ABŞ-nin Almaniyadakı hərbi mövcudluğunu azaltmaq qərarı Vaşinqtonun Avropa üzrə müdafiə strategiyasını yenidən formalaşdırır.
ABŞ Müdafiə Nazirliyinin İnsan Resursları Məlumat Mərkəzi və Konqres hesabatlarından toplanmış son məlumatlar ABŞ-nin qitədəki hərbi mövcudluğunun miqyasını ortaya qoyur.
Avropadakı ümumi mövcudluq
2025-ci ilin dekabr ayına olan məlumatlara görə ABŞ-nin Avropadakı daimi bazalarında təxminən 68 000 aktiv hərbi qulluqçu var. Bu rəqəmə təlimlər və müvəqqəti yerləşdirmələr üçün göndərilən rotasiya qüvvələri daxil deyil.
ABŞ ordusu Avropa üzrə 31 daimi baza və Müharibə Nazirliyinin çıxış hüququna malik olduğu 19 hərbi obyekt üzərində fəaliyyət göstərir.
2025-ci ilin dekabr ayının sonuna olan məlumatlara görə ABŞ-nin Avropadakı hərbi mövcudluğu belədir:
Qitədə ən böyük hərbi qüvvə 36 436 aktiv hərbi qulluqçu ilə Almaniyada cəmləşib. Bu qüvvə beş ayrı qarnizona bölünüb və 1952-ci ildən fəaliyyət göstərən Ramstein Hava Bazası və Grafenwöhr təlim mərkəzlərində yerləşir.
Almaniyanı 12 662 hərbçi ilə İtaliya izləyir. İtaliyadakı birliklər Vicenza, Aviano və Neapol kimi strateji nöqtələrdə quru, dəniz və hava qüvvələrindən ibarətdir.
Böyük Britaniya əsasən hava qüvvələrinə aid olan 10 156 hərbçi ilə üçüncü yerdədir, İspaniya isə Cəbəllütariq boğazı yaxınlığındakı dəniz və hava bazalarında 3814 şəxsi heyətə ev sahibliyi edir.
Şərqi Avropa istiqamətində isə daimi və rotasiya qüvvələri fərqi diqqət çəkir. Polşada 369, Rumıniyada 153 və Macarıstanda 77 daimi şəxsi heyət olsa da, bu ölkələr Avropa çəkindirmə təşəbbüsü çərçivəsində minlərlə müvəqqəti qüvvəyə və strateji hava bazalarına ev sahibliyi edir.
Komanda strukturu və vəzifələr
ABŞ Avropa Komandanlığı qitədəki bütün əməliyyatları altı əsas komponent üzrə idarə edir: quru, dəniz, hava, dəniz piyadaları, xüsusi əməliyyatlar və yeni yaradılmış kosmik qüvvələr. Almaniya və İtaliyada yerləşən bu qurumlar Avropa və Afrika üzrə böhranlara müdaxilə və təhlükəsizlik əməkdaşlığına fokuslanır.
Strateji dəyişiklik
Vaşinqton son aylarda müttəfiqlərinin İran məsələsində mövqeyini və müdafiə xərclərini yetərsiz hesab etdiyini daha çox tənqid edir. Almaniyadan çıxarılması planlaşdırılan 5000 əsgər bu narazılığın sahədəki ən konkret göstəricisi kimi qiymətləndirilir.
Mütəxəssislər hesab edir ki, daimi qüvvələrin azaldılması Avropa ölkələrini öz təhlükəsizlikləri üçün daha çox vəsait xərcləməyə təşviq edən bir vasitə kimi istifadə olunur.
Sevinc Əliyeva
Ordu.az
