Ordu.az xəbər verir ki, bu barədə rusiyalı siyasi elmlər doktoru, türkşünas Vladimir Avatkov bildirib.

Avatkovun sözlərinə görə, amerikalılar danışıqları əvvəlcədən qoşunların cəmləşdirilməsi amili kimi istifadə ediblər ki, öz problemlərini həll etmək üçün vaxt qazansınlar.

“Daha sonra baxın, amerikalılar Avropanı və Avropa İttifaqını süni sədlə Rusiyadan ayırdılar. İndi isə onlar faktiki olaraq həmin süni səddi Yaxın və Orta Şərqdə qururlar.

Nə üçün? Ticarəti başqa istiqamətə yönəltmək üçün? Əvvəllər biz Avropa ilə Asiyanın birbaşa ticarət etdiyini görməyə adət etmişdik. Amma ABŞ-də xəritə bir qədər fərqli görünür. Orada mərkəzdə Şimali və Cənubi Amerikalar dayanır, Avropa ilə Asiya isə parçalanmış vəziyyətdədir. Belə olan halda, niyə təsəvvür etməyək ki, ticarət başqa cür gedəcək. Bəli, bu bahadır. Amma axı avropalılar baha mayeləşdirilmiş təbii qaz alırlar. Amerikalılar onları buna məcbur etdilər”, - deyə ekspert izah edib.

Onun sözlərinə görə, eyni qaydada avropalılar Panama kanalı vasitəsilə Şimali və Cənubi Amerikadan keçəcək baha Çin mallarını da ala bilərlər.

“Yeri gəlmişkən, Tramp məhz buna görə Panama kanalına bu qədər böyük diqqət yetirirdi, çünki Avropa ilə Asiya arasında malların hərəkəti əvvəlki kimi mümkün olmaya bilər. Və görünür, bu mümkün olmayacaq, xüsusilə də nəzərə alaq ki, Hörmüz boğazı guya blokadadan çıxarılıb, amma əslində blokadadadır. Amerikalılar blokadaya alaraq blokadadan çıxarırlar. Məhz məqamın mahiyyəti budur. Niyə yarımçıq tədbirlərlə kifayətlənəsən? Aydındır ki, amerikalılar qarşıdurmanın genişlənməsində maraqlıdırlar”, - rusiyalı türkşünas vurğulayıb.

Avatkovun fikrincə, qarşıdurmanın ikinci mərhələsi tamamilə fərqli ola bilər.

“Amerikalılara baş verənlərdə bütün oyunçuların maksimum dərəcədə iştirak etməsi lazımdır. Ərəblər cəlb olunmadılar, lakin qarşıdurma davam edərsə, onların cəlb olunması ehtimalı çox böyükdür. Bununla yanaşı, yalnız bir yol qalır, mülki təyyarələrin hərəkətinə baxın. Onlar indi necə uçurlar? Bu dar zolaqla, Cənubi Qafqaz və Türkiyə üzərindən uçurlar. Amerikalıların aktivləşdirməyə çalışacaqları növbəti məsələlər bunlardır. Cənubi Qafqaz və Türkiyə. Hansından başlayacaqlarını bilmirəm.

Amma aydındır ki, qarşıdurmanı daha da genişləndirmək cəhdi olacaq. Buna İsrailin hərəkətləri hesabına nail olmaq olar”, - deyə Avatkov sözlərini yekunlaşdırıb.

Alpər Mövludoğlu
Ordu.az