Ordu.az xəbər verir ki, bunu rusiyalı politoloq Sergey Markedonov “Tsargrad.tv” nəşrinə açıqlamasında deyib.

Mütəxəssis bəzi tənqidçilərin Rusiyanın ümidini erməni müxalifətinə bağlaması ilə bağlı iddialarını şərh edib.

Onun sözlərinə görə, Moskvanın mövqeyi konkret bir şəxsi dəstəkləmək deyil, Rusiya ilə münasibətlərdə yürüdülən siyasi kursu bəyənməkdir.

“Rusiya tərəfi üçün qarşıdakı seçkilərin mümkün qədər qarşıdurmalardan uzaq keçməsi vacibdir. Öz maraqlarını irəli aparmaqda maraqlı olmayan hər hansı bir ölkəni kim göstərə bilər? Qəribə narrativlər yayılır ki, guya Rusiya orada öz mövcudluğunu istəyir. Bəs ABŞ istəmir? Elə düşünmək olar ki, guya Avropa İttifaqı bunu istəmir, ya Fransa, ya da, əlbəttə, Türkiyənin Qafqazda maraqları yoxdur”, - deyə Markedonov bildirib.

Politoloq qeyd edib ki, Nikol Paşinyan seçkilərdə qalib gəlsə, Samvel Karapetyanın, Robert Köçəryanın və onların tərəfdarlarının yaxın olduğu yanaşmalar aradan qalxmayacaq: “Paşinyanın seçilməsi ilə bütün siyasi qüvvələrin birdən-birə “real Ermənistan” anlayışını sitat gətirməyə başlayacağını düşünmək də yanlışdır. Oxşar vəziyyət əks ssenaridə də gözlənilir. Karapetyanın və ya hər hansı başqa müxalifət namizədinin qələbəsi həmin anlayışın yoxa çıxmasına gətirib çıxarmayacaq”.

Markedonov seçki nəticələrinin siyasi prosesin müəyyən yekun nəticəsi kimi qəbul edilməsini saxta adlandırıb. “Ermənistanda, hər hansı başqa ölkədə olduğu kimi, ictimai əhval-ruhiyyənin rəngarəngliyi qalır və səsvermənin nəticəsindən asılı olmayaraq gələcəkdə də qalacaq. Rusiyanın məqsədi regionda təsirinin ABŞ-ninkindən, Avropa İttifaqınınkından, Fransanınkından və ya Türkiyəninkindən daha böyük çəkiyə malik olmasını təmin etməkdir”, - deyə o qeyd edib.

Alpər Mövludoğlu
Ordu.az