Ordu.az xəbər verir ki, bu barədə Ermənistanın “168.am” nəşri “Nikol Paşinyan 44 günlük müharibədən sonra hansı hesabatı təqdim etməli idi? Mayın 28-də “qəhrəman ordu” olacaqmı?” başlıqlı məqaləsində yazıb.
“Beləliklə:
Hərbi akademiyanın kursantları ilə bağlı Paşinyan və Papikyanın təqdim etdiyi fərqli rəqəmlər
Parlamentdə Paşinyan deyib: “Ötən il Vazgen Sarkisyan adına Hərbi Akademiyaya qəbul olunanların sayı 2018-ci illə müqayisədə 2,7 dəfə artıb”.
Daha sonra o, sözünə davam edib: “Heç kim qeyd etmir ki, 2018-ci ildə Hərbi Akademiya kursantların yoxluğu səbəbindən bağlanmaq həddində idi, bundan danışmırlar, danışmırlar. 2,7 dəfə artıb və tələbələr 175 min dram təqaüd alırlar, üstəlik, onlar məzun olanda artıq attestasiya olunmuş hesab ediləcəklər və zabit kimi 750.000 dramadək maaş almaq imkanı əldə edəcəklər. 2026-cı ildən etibarən qəbul olunan və xidmətə başlayan məzunlar mənzil alacaqlar”.
Burada bir neçə məqamı xatırlatmağı vacib sayırıq:
2025-ci il aprelin 17-də parlamentdə parlamentin müdafiə və təhlükəsizlik məsələləri daimi komissiyasının sədr müavini Armen Xaçatryan hərbi təhsil sahəsində qeydə alınan dəyişikliklərdən danışarkən yolverilməz ifadələr işlətmişdi.
“2021-2022-ci illərə qədər Hərbi Akademiya nə idi? O, “koloniya” ilə hərbi hissə arasında hansısa bir müəssisə idi. Hətta demək olar ki, bədən tərbiyəsi kafedrası yox idi, hər yer viran idi, içəridə hər şey dağıdılmışdı, normal müəllim kafedraları yox idi. Elə il olub ki, akademiyada abituriyentlərin sayı cəmi 16 nəfər olub və bu şəraitdə biz ordu istəyirdik? Baza təhsilli zabitsiz? Hərbi akademiyasız?” - deyə o bildirmişdi.
Biz yalnız keçmiş “qaişnik”in iddialarına və yolverilməz ifadələrinə faktlarla cavab verməmişik, həm də dərhal, 2025-ci il aprelin 19-da Ermənistan Müdafiə Nazirliyinə yazılı sorğular göndərmişik və aşağıdakı sualları ünvanlamışıq:
Aprel döyüşlərindən əvvəl, 2010-cu ildən başlayaraq və ondan sonrakı dövrdə Ermənistan Müdafiə Nazirliyinin V. Sarkisyan adına Hərbi Universitetinə müraciət edənlərin ən çox və ən az sayı nə vaxt qeydə alınıb? 2018-ci ilədək hakimiyyət dəyişikliyinə qədər konkret ili göstərin.
2018-ci ildən sonra Ermənistan Müdafiə Nazirliyinin V. Sarkisyan adına Hərbi Universitetinə müraciət edənlərin ən çox və ən az sayı nə vaxt qeydə alınıb? 2022-ci il daxil olmaqla konkret ili göstərin.
Aprel döyüşlərindən əvvəl, 2010-cu ildən başlayaraq və ondan sonrakı dövrdə Ermənistan Müdafiə Nazirliyinin marşal Armenak Xanperyants adına Hərbi Aviasiya Universitetinə müraciət edənlərin ən çox və ən az sayı nə vaxt qeydə alınıb? 2018-ci ilədək hakimiyyət dəyişikliyinə qədər konkret ili göstərin.
2018-ci ildən sonra Ermənistan Müdafiə Nazirliyinin marşal Armenak Xanperyants adına Hərbi Aviasiya Universitetinə müraciət edənlərin ən çox və ən az sayı nə vaxt qeydə alınıb? 2022-ci il daxil olmaqla konkret ili göstərin.
Xahiş edirik, artıq Ermənistan Müdafiə Nazirliyinin V. Sarkisyan adına Hərbi Akademiyasına müraciət edənlərin sayını 2023-2024 və 2024-2025 tədris illəri üzrə təqdim edin.
Lakin təxminən 20 gün sonra cavab məktubunda Ermənistanın müdafiə qurumu bizim tələb etdiyimiz məlumatları verməkdən imtina edib və “Dövlət sirri haqqında” qanunun 29-cu maddəsinə (Məhdud yayılmış xidməti məlumat), “İnformasiya azadlığı haqqında” Ermənistan qanununun 8-ci maddəsinin 1-ci hissəsinin 1-ci bəndinə və Ermənistan hökumətinin 11.01.2024-cü il tarixli N5З-N qərarının 8-ci bəndinin tələblərinə istinad edib”, - deyə mqalədə qeyd edilib.
Nəşr bildirib ki, yəni iqtidar deputatı Hərbi Akademiyaya müraciət edənlərin sayını dəqiq il göstərmədən açıqlayır və biz bunun nə vaxt baş verdiyini, bu ittihamın nə dərəcədə əsaslı olduğunu aydınlaşdırmağa çalışanda Ermənistan Müdafiə Nazirliyi bunu dərc olunmayan məlumat hesab edir.
“Bundan başqa qeyd edək ki, məsələn, 2006-2007-ci tədris ili üzrə, eləcə də 2016 və 2020-ci illərə aid rəqəmsal məlumatlar açıqlanmışdı. Buna görə də sual yaranır: Ermənistan Müdafiə Nazirliyi xüsusilə bu, fəaliyyətdə olan hakimiyyətin və müdafiə nazirinin xeyrinə olduğu halda niyə rəqəmlərdəki dalğalanmaları göstərmək istəməyib? Bundan sonra, əlbəttə, biz müdafiə qurumundan yenidən rəqəmsal məlumatlar almağa çalışmışıq, amma nəticəsiz olub.
Və artıq 2026-cı ilin aprelində Nikol Paşinyan yenidən Hərbi Akademiyaya müraciət edənlərin sayını gündəmə gətirdiyinə görə, bu dəfə Suren Papikyanın rəhbərlik etdiyi qurumdan bir daha artıq açıq rəqəmsal məlumatların təqdim edilməsini xahiş etmişik. Təqdim edəcəklərmi, yoxsa yenə yayınacaqlar? Halbuki onların özlərinə görə statistika onların xeyrinədir”, - deyə nəşr yazıb.
Müəllif qeyd edib ki, 2023-cü il iyunun 8-də Ermənistan hökumətinin 914 A nömrəli qərarı ilə “Vazgen Sarkisyan adına Hərbi Universitet” və “Marşal Armenak Xanperyants adına Hərbi Aviasiya Universiteti” dövlət müəssisələrinin birləşdirilməsi yolu ilə Ermənistan Müdafiə Nazirliyinin “Vazgen Sarkisyan adına Hərbi Akademiya” dövlət müəssisəsi yenidən təşkil edilərək yaradılıb.
“Deməli, bu faktı nəzərə alaraq və həmçinin əgər Paşinyanın dediyini qəbul etsək ki, 2018-ci ildə Hərbi Universitet müraciət edənlərin azlığı səbəbindən bağlanmaq həddində idi, onda son illərdə verilən imtiyazlar şəraitində 2018-ci ilin Hərbi Universiteti ilə 2025-ci ilin Hərbi Akademiyasına müraciət edənlərin sayının müqayisəsi və 2,7 dəfə artım qeydə alındığı iddiası doğrudanmı çox əhəmiyyətli göstəricidir?
Bundan başqa, 5 ay əvvəl, 2025-ci il noyabrın 13-də parlament tribunasından Ermənistanın müdafiə naziri Suren Papikyan bəyan etmişdi: “Akademiyanın kursantlarının sayı 2018-ci illə müqayisədə 26% artıb ki, bu da cəmiyyətimizin hərbi təhsilə münasibətinin və gənclərimizin bu peşəyə münasibətinin əhəmiyyətli dərəcədə dəyişdiyini göstərir”.
Qəbul edək ki, Nikol Paşinyanın və Suren Papikyanın təqdim etdiyi rəqəmlər fərqlidir”, - deyə müəllif vurğulayıb.
Nəşrin yazdığına görə, yeri gəlmişkən, generallara “dərs keçən” Paşinyan bu ilin yanvarında unutmuşdu ki, Vazgen Sarkisyan adına Hərbi Universitet 2023-cü ilin iyunundan akademiya statusu daşıyır və hərbi təhsil müəssisələrində oxuyanlar tələbə yox, kursant adlanır.
“Ötən gün parlamentdə bu baxımdan səhvlər yox idi. Müsbət qeyd…
Biz isə Ermənistanın müdafiə naziri Suren Papikyanın və onun rəhbərlik etdiyi qurumun reaksiyasını gözləyəcəyik ki, ən azı 2018 və 2025-ci illər üzrə Hərbi Universitetin, daha sonra isə akademiyanın kursant sayını təqdim etsin və təsdiqləsin və ya təkzib etsin, doğrudanmı bağlanmaq həddində olub?
Mayın 28-də Respublika meydanında Paşinyan sadəcə seçkiqabağı hesabat verəcək
Nikol Paşinyan öaprelin 15-də parlamentdə iddia edib ki, onlar peşəkar ordu yolundadırlar, həm müddətli, həm də müddətsiz hərbi qulluqçuları saxlamağa qadirdirlər. Və buradan da möhkəmləndirilmiş rayonlara keçid edib.
O deyib: “Biz əlavə altı və altı milyard dollar haqqında danışanda, o pullar haradadır? Gedin möhkəmləndirilmiş rayonlara və görün o pullar haradadır. Gedin möhkəmləndirilmiş rayonlara və görün təhlükəsizlik necədir, əsgərin rifahlı və rahat xidməti necədir. Möhkəmləndirilmiş rayonlar məsələsində müxalifətdən xahiş edir, yalvarırıq, deyirik, qulaq asın, gəlin, sizi dəvət edirik, gedək baxaq, gedək baxaq və siz də öz dövrünüzdən buna heç olmasa 73 km yaxın olan bir şeyi göstərin, bir dənə göstərin. Guya bizə cavab verəndə deyirdilər ki, bizim möhkəmləndirilmiş rayonlarımız... siz konserv bankalarının qapaqları ilə nəsə etmisiniz, sizin alternativiniz konserv bankalarının qapaqları olub, burada buna etiraz edirdilər...”, - deyə o bəyan edib və ordu üçün görülən hansısa işləri borc yox, sanki “adanmışlıq” kimi təqdim edib, vəzifə və məsuliyyət kimi yox.
Yeri gəlmişkən, 2022-ci ildə biz Tavus istiqamətindəki mövqelərdə “konserv bankası qapaqları” qeydə almışdıq və daha sonra çəkdiyimiz şəkli Nikol Paşinyanın aparat rəhbərinin müavini Taron Çaxoyan keçmişlərin dövrünə aid mövqelərin fotosu kimi təqdim etmişdi”, - deyə müəllif bildirib.
Nəşr qeyd edib ki, bundan başqa, vaxtilə hakim qüvvənin nümayəndələri mövqelərdə təkərlərin olmasını məsxərəyə qoyurdular, amma bu gün də mövqelərdə təkərlər görmək olar.
“Əlbəttə, heç kim ordu mövqelərində aparılmış abadlaşdırma işlərini və mühəndis həllərini görməzdən gəlmir. Bununla bağlı bir neçə gün əvvəl Suren Papikyan yenə video yaymışdı. Amma sən müharibəni uduzmusan, mövqe toqquşmaları zamanı ciddi insan və ərazi itkiləri vermisən və davamlı olaraq keçmişlərin “banka-butulka”sını xatırladırsan, bu, doğrudanmı dürüstdür və ya doğrudur? Əvvəllər bəlkə də daha çox iş görmək olardı, amma 2016-cı ilin aprel döyüşlərindən bir ay sonra gedib səngər qazdığın, buna görə fəxri fərman və medal aldığın keçmiş müdafiə naziri Seyran Ohanyanı məsxərəyə qoymaq mənəvidirmi?
Paşinyan isə sonda parlament tribunasından mayın 28-də Respublika meydanında gözlənilən silah nümayişini xatırlatmaya bilməzdi, bu barədə biz çox daha əvvəl məlumat vermişdik.
“Silahların alınmasına gəlincə, bəli, bu, o cümlədən bir sıra obyektiv və subyektiv hallara görə xarici mənbələrdən cəlb edilmiş vəsaitlər hesabına da alınıb. Xatırlayırsınız ki, Ermənistanın xarici borcu, dövlət borcu barədə daimi manipulyasiyalar vardı, mən buna cavab verdim. Mən indi silahlar haqqında danışmıram, çünki necə deyərlər, bir dəfə görmək yüz dəfə eşitməkdən yaxşıdır və biz, yenə vurğulamaq istəyirəm, ümumiyyətlə belə niyyətə malik deyildik, belə arzumuz da yox idi, xüsusən də çox gizli informasiyalar var, yəni elə şeylər var ki, onsuz da bütün ölkələr, əlbəttə, bunu edir və bu və ya digər şəkildə beynəlxalq mətbuatda bizim nə aldığımız dövr edib. Amma hər halda biz xalqımız qarşısında hesabat vermək istəyirik ki, son illərdə hansı silahları almışıq. Mayın 28-də, Respublika Günü münasibətilə Respublika meydanında, yeri gəlmişkən, yalnız 2022-ci ildən sonra aldığımız silahları göstərəcəyik və sadəcə xalqımıza hesabat vermək istəyirik. Ümid edək ki, suallar bağlanacaq. Həm də istehsal etmək…”, - Paşinyan aprelin 15-də parlamentdə hökumətin 2021-2026-cı illər proqramının icra gedişi və nəticələri haqqında 2025-ci il hesabatının müzakirəsində bildirib və əlavə edib ki, guya həmin gün gizlədilməli olan nə varsa, gizlədiləcək.
Yəni bu, ordunun döyüş qabiliyyətinin və ya onların dediyi kimi müdafiə qabiliyyətinin nümayişi deyil, daha çox öz adı üçün verilən hesabatdır”, - deyə məqalədə qeyd edilib.
Müəllif yazıb ki, başqa sözlə, günün qəhrəmanı ordu yox, Nikol Paşinyan və onun hakimiyyəti olacaq.
“Əlavə edək ki, yaxınlarda Suren Papikyan da bəyan etmişdi ki, onun vəzifədə olduğu dövrdə “silahlanmaya keçmiş iki prezidentin dövründəkindən 5,4 dəfə çox vəsait xərclənib”.
Əlbəttə, orduya aid hər hansı nailiyyət müsbətdir, lakin ordunun döyüş qabiliyyəti yalnız silahlanma ilə müəyyənləşmir, burada şəxsi heyətin sayı, onun döyüş hazırlığı səviyyəsi və sair daxil olmaqla bir sıra komponentlər var. Hələ onu demirik ki, dövlət haqqında müharibənin nəticələrinə görə mühakimə yürüdürlər.
Bu bəyanatdan əvvəl biz müdafiə nazirinə yazılı sorğu göndərmişdik ki, 2018-ci il inqilabından əvvəl Ermənistan Rusiyadan başqa hansı ölkələrdən silah və hərbi texnika alıb və konkret nə alıb, həmçinin dövlət borcunun artımının neçə faizi yeni silahların alınmasına düşür. Lakin Suren Papikyan bu məlumatları bizə təqdim etməkdən imtina etmişdi.
“168.am” həmçinin yazıb ki, 44 günlük müharibədən əvvəl Ermənistan Silahlı Qüvvələri Baş Qərargahının keçmiş rəisi Onik Qasparyan Paşinyana dəyəri 8 milyard dollar olan silahlanmanın inkişafı layihəsini təqdim etmişdi və bu layihə hətta həmin anda rədd edilməyibsə belə, əslində həyata keçirilməyib.
Maraqlıdır ki, Nikol Paşinyan və onun hökuməti sanki 2018-2022-ci illəri unudurlar, halbuki 2019-cu ildə hər uyğun və yersiz fürsətdə misilsiz silah alışları ilə fəxr edirdilər. Bu baxımdan da xərclər və müharibədəki itkilərlə bağlı hesabat təqdim edilməməlidirmi?”, - deyə nəşr bildirib.
Alpər Mövludoğlu
Ordu.az
