Ordu.az xəbər verir ki, bu barədə Ermənistanın “Past” nəşri “Boş evlər, itirilmiş subsidiyalar” başlıqlı məqaləsində yazıb.

Nəşrə görə, proqramın məqsədi məskunlaşmanı təşviq etmək və yerli əhaliyə dəstək vermək idi, lakin dövlət subsidiyaları məhz nəzərdə tutulduğu ailələrə çatmayıb.

“Yerli sakinlər “Past”a kənd mənzil tikintisi proqramının uğursuzluğa düçar olduğunu bildiriblər. İyunun 7-də keçiriləcək parlament seçkiləri ərəfəsində ictimai müstəvidə sosial və iqtisadi proqramların effektivliyi ilə bağlı problemlər daha tez-tez səslənir. Bu kontekstdə Tavusdan gələn siqnallar dövlət proqramlarının real təsirinə, xüsusən də əhalinin qorunmasının həyati əhəmiyyət daşıdığı sərhəd yaşayış məntəqələrində yeni işıq salır”, - deyə qəzet yazıb.

Nəşr vurğulayıb ki, yerli sakinlərin məlumatına görə, subsidiya proqramının icrası anlaşılmaz və qeyri-şəffaf mexanizmlərlə müşayiət olunub. Onların sözlərinə görə, yardım seçmə prinsipi ilə bölüşdürülüb və çox vaxt əsas benefisiarları yan keçib.

“Bunun nəticəsində həqiqətən mənzil problemi olan və sərhəd kəndlərində yaşayan ailələr lazım olan dəstəyi almayıblar. Yaranmış vəziyyət paradoksa gətirib çıxarıb, dövlət vəsaiti hesabına tikilmiş və ya alınmış çoxsaylı evlər bu gün boş qalır. Hər bir sakinin strateji əhəmiyyət daşıdığı ərazilərdə proqram nəinki məskunlaşmanın artmasına kömək etməyib, hətta qarşıya qoyulan vəzifələri də faktiki olaraq həll etməyib”, - deyə məqalədə bildirilir.

Nəşrin yazdığına görə, yerli sakinlər hesab edirlər ki, bu hal bir daha dövlət sisteminin fəaliyyət tərzini göstərir.

“Onların fikrincə, hətta inkişaf yönümlü proqramlar belə maraq toqquşmasından kənarda qalmır və çox vaxt dar qrup maraqlarına xidmət edir.

Belə yanaşma yalnız kəndlərin inkişafına kömək etmir, əksinə mövcud problemləri dərinləşdirir və dövlət proqramlarına inamsızlığı artırır.

Bu hekayə bir daha mühüm sual doğurur: dövlət proqramları həqiqətən ictimai maraqlara nə dərəcədə xidmət edir və onlar effektiv və ədalətli bölgü baxımından nə dərəcədə nəzarətdə saxlanılır? Tavusda boş qalan evlər əslində bu sualın ən aydın cavablarından birinə çevrilib”, - deyə “Past” qeyd edib.

Alpər Mövludoğlu
Ordu.az