Ən müasir İDP-ləri hazırlayan ABŞ Hərbi Dəniz Qüvvələrinin xüsusi işçi qrupu ən perspektivli layihələrindən birini ilk dəfə tərəfdaş ölkənin gəmisindən suya buraxıb.
Fevralın əvvəlində Hind okeanında Seyşel adaları sahillərində keçirilən “Cutlass Express 26” təlimi zamanı 66-cı Tapşırıq Qrupu Komandanlığı Seyşel Sahil Mühafizəsinin gəmisindən “Lightfish” İDP-sini suya buraxıb.
ABŞ Hərbi Dəniz Qüvvələrinin “Lightfish” İDP-si haqqında
“Lightfish” İDP-sinin suya buraxılması Seyşel Hərbi Dəniz Qüvvələri ilə birgə İDP təlim tədbirinin bir hissəsi olub. Tədbirin məqsədi məhdud əlaqə şəraitində açıq okeanda İDP-nin imkanlarını sınaqdan keçirmək olub.
“Lightfish” İDP-si kəşfiyyat, müşahidə, məlumat toplama (ISR) və radioelektron mübarizə missiyalarını yerinə yetirə bilən çoxməqsədli platformadır. İDP sistemlərini enerji ilə təmin etmək üçün kvadrat formalı günəş panellərindən istifadə edərək enerjini elektrikə çevirir. Bu enerji sistemi “Lightfish”ə heç bir dəstək olmadan böyük su hövzələrini keçməyə imkan verir, donanmanın gözü və qulağı rolunu oynayır.
66-cı Tapşırıq Qrupu Komandanlığı tamamilə insansız sistemlərdən ibarət olan bir qurumdur, Hərbi Dəniz Qüvvələrinin 6-cı Donanmasının döyüş qabiliyyətini artırmaq üçün insansız sistemlər, süni zəka və maşın öyrənməsi də daxil olmaqla yeni qabaqcıl texnologiyaları layihələndirir və sınaqdan keçirir.
İtaliyanın cənubundakı Neapol şəhərində yerləşən ABŞ 6-cı Donanması Hərbi Dəniz Qüvvələrinin Avropa və Afrikada birgə və dəniz əməliyyatlarına cavabdeh əsas döyüş qüvvəsidir. Süveyş kanalı, Şərqi Aralıq dənizi, Qırmızı dəniz, Ərəb dənizi və Hind okeanı kimi mühüm dəniz yollarına yaxınlığı səbəbindən bu, donanmanın ən vacib komandanlıqlarından biridir.
“Cutlass Express 2026” zamanı dəniz tərəfdaşlarımızla birlikdə robotlaşdırılmış və insansız imkanlarımız vasitəsilə gücləndirilmiş döyüş bacarıqlarımızı nümayiş etdirərək tarix yazırıq”, - deyə ABŞ Hərbi Dəniz Qüvvələrinin leytenantı, 66-cı Tapşırıq Qrupu Komandanlığının əməliyyat zabiti Brina Lorancer xidmətin mətbuat açıqlamasında bildirib.
Lorancer, həmçinin qeyd edib: “6-cı Donanma bu təlim çərçivəsində qarşılıqlı uyğunluğu təşviq etməklə tərəfdaşların dəniz sahəsində məlumatlılıq imkanlarını artırmağın yeni yollarını axtarır. Seyşel Sahil Mühafizəsinin resurs və infrastrukturunu paylaşaraq və sınaqdan keçirərək ABŞ Afrika Komandanlığının məsuliyyət zonasında ekspedisiya tipli robotlaşdırılmış avtonom sistemlər üzrə imkanlarımızı gücləndiririk”.
Çinlə davam edən geosiyasi rəqabətdə ABŞ Hərbi Dəniz Qüvvələri mərkəzi rol oynayır, ondan sonra isə Hərbi Hava Qüvvələri və Dəniz Piyadaları Korpusu gəlir. Şübhəsiz ki, Quru Qoşunlarının da mühüm rolu olacaq, lakin Çinlə mümkün hərbi toqquşma əsasən dənizdə və havada baş verəcək.
Donanma Çindən öndə qalmaq üçün yeni texnologiyalardan istifadə edir
“Cutlass Express 2026” kimi təlimlər vasitəsilə biz tərəfdaşlarımızla birlikdə insansız taktikanı birbaşa əməliyyatlara inteqrasiya edərək uyğunlaşırıq”, - deyə 66-cı Birləşmiş Tapşırıq Qrupunun komandanı, Hərbi Dəniz Qüvvələrinin kontr-admiralı Kelli Uord bildirib.
Yüksək rütbəli zabit, həmçinin qeyd edib: “Biz bu sahədə tərəfdaşlarımızla çiyin-çiyinə irəliləyir, yenilikləri döyüş hazırlığına çevirir və dəniz təhlükəsizliyini gücləndirərək naviqasiya azadlığını qoruyuruq”.
Uordun vurğuladığı bu məqam vacibdir. Texnologiya sürətlə inkişaf edir. Hər texnoloji yenilik daha effektiv döyüş qabiliyyətinə çevrilməsə də, yeni texnologiyalar müharibələrin aparılma formasını dəyişir. Xüsusilə insansız sistemlər artıq döyüş meydanında mühüm rol oynayır və kinetik əməliyyatlarda, kəşfiyyat, müşahidə, məlumat toplama (ISR) və dəstək missiyalarında getdikcə daha böyük paya sahib olur.
ABŞ-nin rəqibləri, o cümlədən Çin də dron texnologiyalarına böyük vəsait yatırır və bu, Birləşmiş Ştatları rəqabət qabiliyyətini qorumaq üçün çevik qalmağa məcbur edir.
Sevinc Əliyeva
Ordu.az
