Ordu.az xəbər verir ki, əgər simmetrik yükləmə aparılıbsa, bu təyyarə ümumilikdə 42 raket və əlavə olaraq 8 “hava-hava” raketi ilə təchiz oluna bilər.
Bu konfiqurasiya F-15E-ni bir növ “uçan sursat anbarına” çevirərək, Pilotsuz Uçuş Aparatları (PUA) və qanadlı raketlərə qarşı tək yüklə 50 hədəfə yönəlmə imkanı verir.
Sistem haqqında
APKWS II (Advanced Precision Kill Weapon System II) ABŞ ordusunda hazırda F-16, A-10, AV-8B “Harrier” və F/A-18 kimi bir çox platformada həm “hava-yer”, həm də “hava-hava” tapşırıqları üçün aktiv şəkildə istifadə olunur. Son olaraq Qırmızı dəniz regionunda husi PUA-larına qarşı F-16-larda uğurla sınaqdan keçirilmiş APKWS II ucuz qiyməti (~20.000$) və yüksək sursat dərinliyi ilə seçilir.
Fotoşəkildə görünən “F-15E Floridadakı “Eglin” Hava Bazasında yerləşən 96-cı Sınaq Qanadına məxsusdur. Bazada aparılan sınaqlarda lazerlə idarə olunan raketlərin hədəf aşkarlama və izləmə sistemləri (məsələn, AN/AAQ-33 “Sniper ATP”) ilə inteqrasiyası sürətlə təmin olunub. Nəticədə, PUA və yavaş hərəkət edən hədəflərə qarşı daha çox ələ keçirmə imkanı yaranır. Əldə olunan məlumatlar göstərir ki, F-15E parkının xüsusən PUA hücumlarına qarşı davamlı müdafiəni təmin etmək üçün APKWS II ilə təchiz oluna biləcəyi ortaya çıxır.
F-15EX-ə də inteqrasiya olunacaq
F-15E-lərdən əlavə, eyni silah sistemi F-15EX “Eagle II”də də inteqrasiya olunmağa hazırlaşır. “Eagle II” daha yüksək məsafə, inkişaf etmiş radar və proqram təminatı infrastrukturuna sahib olacaq və ABŞ-nin daxili müdafiəsində əsas rol oynayacaq. Mütəxəssislər bildirirlər ki, F-15 platformasının bu yeni konfiqurasiyası İsrail kimi intensiv PUA təhlükəsi altında olan dövlətlər üçün də model rolunu oynaya bilər.
Xüsusilə 2024-cü ilin aprelində İranın İsrailə təşkil etdiyi PUA və raket hücumları zamanı F-15E-lərin sursatı tükəndiyi üçün “M61 Vulcan” topuna keçid etdiyi bildirilmişdi. Bu hadisə, daha aşağı qiymətli, yüksək ələ keçirmə qabiliyyətli sursatlara ehtiyacın vacibliyini bir daha gündəmə gətirdi.
ABŞ Konqresi isə “Strike Eagle” parkının 2027-ci ilə qədər təqaüdə çıxmasını əngəlləyən qanunvericiliklə bu platformanın hələ də əsas rol oynadığını təsdiqləyir. F-15E-lərin lazerlə idarə olunan raketlərlə təchiz olunması, bu hava vasitəsi üçün yenidən müəyyən edilmiş bir tapşırıq spektri yaradır: aşağı büdcəli, yüksək həcmli ələ keçirmə qabiliyyəti ilə kütləvi PUA sürülərinə qarşı cəbhə müdafiəsi.
F-15E + APKWS II kombinasiyası gələcəkdə həm ABŞ Hərbi Hava Qüvvələrinin, həm də müttəfiq ölkələrin müasir hava müdafiə strategiyalarında kritik rol oynayacaq kimi görünür.
Sevinc Əliyeva
Ordu.az
