Ordu.az xəbər verir ki, hücum zamanı Moskva Neft Emalı Zavodu bir həftə ərzində ikinci dəfə vurulub və müəssisənin kritik istehsal bölmələrinə ciddi ziyan dəyib.
Rusiya rəsmiləri paytaxta doğru hərəkət edən 194 PUA-nın hava hücumundan müdafiə sistemləri tərəfindən məhv edildiyini açıqlayıblar.
Rusiya Müdafiə Nazirliyi isə ölkə üzrə gecə saatlarında 555-dən 1000-ə qədər PUA-nın zərərsizləşdirildiyini iddia edib. Hücum səbəbindən Moskvanın bütün əsas hava limanlarında uçuşlar müvəqqəti dayandırılıb. Rəsmi məlumatlara görə, ən azı 17 nəfər yaralanıb.
Məlumata görə, “Qazprom Neft” şirkətinə məxsus Moskva Neft Emalı Zavodunda bu həftə baş verən ikinci hücum müəssisənin 2020-ci ildə istismara verilmiş “Euro+” inteqrasiya edilmiş neft emalı qurğusunu hədəfə alıb.
Zərər görən kompleksin gündəlik təxminən 140 min barel xam neft emalı gücünə malik olduğu və zavodun ümumi emal potensialının 47 faizini təşkil etdiyi bildirilir. Qurğunun tərkibinə xam neft distillə sistemi, katalitik reforminq qurğusu və dizel yanacağının hidroemalı kompleksi daxildir.
Hücum nəticəsində bəzi əlavə emal bölmələrinin, boru kəmərlərinin, yardımçı avadanlıqların və neft məhsullarının saxlandığı çənlərin də zərər gördüyü, bir neçə nöqtədə yanğın baş verdiyi qeyd olunur.
Xatırladılır ki, zavod 2026-cı il iyunun 16-da həyata keçirilən əvvəlki Ukrayna hücumu zamanı da ciddi ziyan almışdı. Həmin vaxt müəssisənin əsas xam neft distillə qurğularından biri olan CDU-6 vurulmuş və yanğın baş vermişdi. Gündəlik təxminən 160 min barel emal gücünə malik bu qurğu zavodun ümumi istehsal potensialının 53 faizini təşkil edir.
Mənbələrin məlumatına görə, müəssisə CDU-6 qurğusunda təmir işləri davam etdiyi müddətdə “Euro+” kompleksini yenidən işə salaraq zavodu yarım güclə işlətməyi planlaşdırırdı. Lakin son hücum bu planların həyata keçirilməsinə mane olub.
Moskva Neft Emalı Zavodu paytaxtın yanacaq tələbatının təxminən 40 faizini təmin edir. Müəssisə eyni zamanda Moskvanın dörd əsas hava limanının hamısını aviasiya yanacağı ilə təchiz edir. Zavodun illik emal gücü 12 milyon tondan çoxdur.
Analitiklər bildirirlər ki, Rusiya dövlət büdcəsinin təxminən üçdə biri neft gəlirlərindən formalaşır. Bu səbəbdən neft emalı zavodları və enerji infrastrukturu Ukraynanın əsas hədəfləri sırasında yer alır.
Ukrayna Silahlı Qüvvələrinin Baş Qərargahı hücum nəticəsində zavodun ən azı beş nöqtəsində yanğın baş verdiyini açıqlayıb. Bildirilir ki, inteqrasiya edilmiş neft emalı qurğusu, əlavə emal kompleksləri və saxlama sahələri hədəfə alınıb.
Məlumata görə, Rusiyanın Rostov vilayətində yerləşən Qukovo yanacaq bazası da vurulub. Ukrayna tərəfi bu obyektin Rusiya ordusunun logistika fəaliyyətində istifadə olunduğunu bildirib.
Ukrayna Prezidenti Volodimir Zelenski hücumun Rusiyanın son dövrlərdə Ukrayna şəhərlərinə və enerji infrastrukturuna qarşı həyata keçirdiyi zərbələrə cavab olduğunu qeyd edib.
Zelenskinin sözlərinə görə, Moskva Neft Emalı Zavodunun qısa müddət ərzində ikinci dəfə vurulması məqsədli qərar olub. O bildirib ki, Rusiya hücumlarını davam etdirəcəyi təqdirdə Ukrayna da uzaqmənzilli PUA əməliyyatlarını davam etdirəcək.
“Putin bu müharibəni bitirmək istəmirsə, biz səssiz qalmayacağıq. Cavab verəcəyik və bu cavab güclü olacaq. Ukrayna yanarsa, Moskva da yanacaq”, - deyə Zelenski bildirib.
Ukrayna Prezidenti əlavə edib ki, Rusiyaya bu müharibəni davam etdirməyin mənasız olduğunu hiss etdirmək lazımdır. Onun fikrincə, Rusiya vətəndaşları bu müharibənin bir nəfərin, yəni Vladimir Putinin qərarı ilə davam etdiyini və bunun bədəlini sadə insanların ödədiyini anlamalıdırlar.
Sevinc Əliyeva
Ordu.az
