Ordu.az xəbər verir ki, bu barədə ABŞ Sakit Okean Donanması məlumat yayıb.
Məlumata görə, “Virginia” sinfinin 15-ci, əhəmiyyətli dərəcədə yenilənmiş Block III seriyasının isə 5-ci nümayəndəsi olan USS “Colorado” Havay adalarındakı Pörl-Harbor Hərbi Dəniz Gəmiqayırma Zavodu və Aralıq Texniki Xidmət Müəssisəsində (PHNSY & IMF) planlaşdırılmış təmir və xidmət dövrünü uğurla başa vurub.
ABŞ Sakit Okean Donanmasının açıqlamasında bildirilib ki, effektiv və səmərəli texniki xidmət Hərbi Dəniz Qüvvələrinin döyüş qabiliyyətini və hazırlıq səviyyəsini qorumağa, eyni zamanda gəmilərin istismar müddətini maksimum dərəcədə uzatmağa imkan verir.
Donanma rəhbərliyi qeyd edib ki, sualtı qayığın vaxtından əvvəl təhvil verilməsi həm gəmiqayırma müəssisəsinin, həm də ekipajın yüksək peşəkarlığını və imkanlarını nümayiş etdirib.
PHNSY & IMF-in komandanı kapitan Rayan Makkrillis bildirib ki, vaxtından əvvəl işləri başa çatdırmaq tələskənlik deyil, gərgin əmək və davamlı səylərin nəticəsidir.
“Bu nəticə ilk dəfədən yüksək keyfiyyətli iş görmək, qarşıya çıxan hər bir maneəni operativ şəkildə aradan qaldırmaq və bütün kollektivin birgə fəaliyyətinin məhsuludur. Burada ən gənc şagirddən tutmuş müəssisə rəhbərliyinə, ekipaja, layihə komandasına və donanma rəhbərliyinə qədər hər kəsin əməyi var”, - deyə o vurğulayıb.
Texniki xidmət işləri ABŞ Hərbi Dəniz Qüvvələrinin “dünya səviyyəli planlaşdırma prosesləri” əsasında həyata keçirilib. Bu çərçivədə ekipaj gəmiqayırma zavodunun mühəndisləri, ustaları və texniki heyəti ilə sıx əməkdaşlıq edib.
Təmir prosesi zamanı qapalı və məhdud sahələrdə görülən işlərdə koordinasiya və komanda işi əsas rol oynayıb. USS “Colorado” layihəsinin rəhbəri Çad Renti Kruz isə bildirib ki, uğurun sirri çoxsaylı kiçik nailiyyətlərin bir araya gəlməsində olub.
“İlk gündən komanda vahid kollektiv kimi fəaliyyət göstərdi. Qarşıya çıxan hər bir problem zamanı lazımi mütəxəssisləri bir araya gətirərək plan hazırladıq və onu dəqiq şəkildə həyata keçirdik”, - deyə o bildirib.
Hazırda “Virginia” sinfi ABŞ Hərbi Dəniz Qüvvələrinin quru, suüstü və sualtı hədəflərə qarşı əsas hücum platforması hesab olunur. Bu sualtı qayıqlar Soyuq Müharibə dövrünün “Los Angeles” sinifli platformalarını əvəz etmək üçün hazırlanıb və ən müasir gizlilik və silah sistemləri ilə təchiz olunub.
Platformalar həm açıq okeanlarda, həm də dayaz sahil sularında fəaliyyət göstərə bilir. Onlar sualtı qayıqlara qarşı mübarizə, kəşfiyyat və müşahidə tapşırıqlarını yerinə yetirmək qabiliyyətinə malikdir. “Block III” seriyası xərclərin azaldılması və döyüş yükü imkanlarının artırılması məqsədilə yaradılıb.
Bu versiyada sualtı qayığın təxminən 20 faizi yenidən layihələndirilib. Əsas dəyişikliklərdən biri ənənəvi sferik sonar sisteminin əvəzinə daha yüngül və daha effektiv Böyük Aperturalı Burun Sonarının (LAB) quraşdırılması olub.
Bu sonar sistemi passiv aşkarlama imkanlarını artırıb və gövdədə yüzlərlə əlavə keçidin aradan qaldırılmasına şərait yaradıb. Eyni zamanda əvvəlki 12 ədəd şaquli buraxılış qurğusu iki iri diametrli, 87 düymlük buraxılış bölməsi ilə əvəz olunub. Hər bir bölmə altı “Tomahawk” raketi daşıya bilir.
USS “Colorado” haqqında
SSN-788 ABŞ Hərbi Dəniz Qüvvələrində Kolorado ştatının adını daşıyan dördüncü gəmi hesab olunur. Bundan əvvəl XIX əsrdə xidmət etmiş üç dirəkli freqat, Birinci Dünya müharibəsində iştirak etmiş zirehli kreyser və məşhur “Colorado” döyüş gəmisi bu adı daşıyıb.
Ən tanınmış USS “Colorado” isə 1923-cü ildə xidmətə qəbul edilmiş BB-45 döyüş gəmisi olub. 1941-ci il dekabrın 7-də Yaponiyanın Pörl-Harbora hücumu zamanı o, Vaşinqton ştatındakı gəmiqayırma müəssisəsində təmirdə olduğundan hücumdan zərər görməyib.
Gəmi Sakit okean müharibəsində çoxsaylı əməliyyatlarda iştirak edib və yeddi döyüş ulduzu ilə təltif olunub. Müharibədən sonra ehtiyat donanmaya çıxarılan platforma 1950-ci illərin sonunda utilizasiya üçün satılıb. Hazırkı USS “Colorado” 2018-ci ilin martında xidmətə qəbul olunub və Sualtı Qayıqlar Eskadrasının 7-ci bölməsinə daxildir.
ABŞ Hərbi Dəniz Qüvvələrinin məlumatına görə, platforma sualtı qayıqlara qarşı mübarizə, suüstü hədəflərə qarşı əməliyyatlar, zərbə missiyaları, xüsusi təyinatlı qüvvələrin dəstəklənməsi, kəşfiyyat, müşahidə və məlumat toplama tapşırıqlarını yerinə yetirir.
Sevinc Əliyeva
Ordu.az
