Ordu.az xəbər verir ki, bu barədə Türkiyənin xarici işlər naziri Hakan Fidan Sofiyada bolqarıstanlı həmkarı Velislava Petrova-Çamova ilə keçirdiyi birgə mətbuat konfransında bildirib.

Fidan qeyd edib ki, tərəflər qarşılıqlı zərbələri mümkün qədər tez dayandırmalı, yenidən danışıqlara başlamalı və razılaşma mətninin hazırlanmasını yekunlaşdırmalıdırlar.

“Biz tərəflərə tövsiyə edirik ki, qarşılıqlı zərbələri mümkün qədər tez dayandırsınlar, danışıqlara qayıtsınlar və üzərində işlədikləri razılaşma mətnini tamamlasınlar”, - deyə Türkiyə XİN rəhbəri vurğulayıb.

Onun sözlərinə görə, son günlər danışıqlar elə mərhələyə çatmışdı ki, sənədin bəzi hissələrində cəmi bir neçə məqamın dəqiqləşdirilməsi qalırdı.

Fidan bildirib ki, hazırda müşahidə olunan qarşılıqlı hücumlar vəziyyətin daha da gərginləşməsi təhlükəsini yaradır və bu, Ankarada ciddi narahatlıq doğurur.

“Hərbi əməliyyatların genişlənməsi və gərginliyin artması heç kimə fayda verməyəcək”, - deyə Türkiyənin xarici işlər naziri əlavə edib.

Sevinc Əliyeva
Ordu.az