Ordu.az xəbər verir ki, son müqavilə dəyişikliklərindən sonra Kentukki ştatında inşa ediləcək TNT istehsalı müəssisəsinə yönəldilən ümumi investisiya məbləği 404 milyon dollara çatıb.
ABŞ Müharibə Nazirliyinin 2026-cı il iyunun 4-də yaydığı müqavilə bildirişinə əsasən, TNT zavodunun tikintisini həyata keçirən “Repkon USA” şirkətinə əlavə 77,9 milyon dollar maliyyə ayrılıb.
Bununla da 2024-cü ildə başladılan layihənin ümumi müqavilə dəyəri 404 milyon dollara yüksəlib. Proqram üçün müəyyən edilən maksimal maliyyə limiti isə 435 milyon dollar səviyyəsində saxlanılıb.
ABŞ-də son 40 ilin ilk TNT zavodu olacaq
Kentukki ştatının Muhlenberq dairəsinin Qraham yaşayış məntəqəsində inşa edilən müəssisə ABŞ-nin 1980-ci illərdən bəri qurduğu ilk TNT istehsalı zavodu olacaq. Layihə tamamlandıqdan sonra ABŞ təxminən dörd onillikdən sonra yenidən TNT ehtiyacını yerli istehsal hesabına qarşılaya biləcək. Mövcud plana əsasən, müəssisənin tikintisinin 2029-cu il fevralın 15-də başa çatdırılması nəzərdə tutulur.
Türk şirkəti layihədə mühüm rol oynayır
Layihəni həyata keçirən “Repkon USA” Türkiyənin müdafiə sənayesi və dəqiq istehsal sahəsində fəaliyyət göstərən “Repkon” şirkətinin ABŞ-dəki törəmə müəssisəsidir. Şirkət daha əvvəl də ABŞ ordusu üçün sursat istehsalı və partlayıcı maddələrin layihələndirilməsi sahəsində müxtəlif müqavilələr imzalayıb.
“Repkon” eyni zamanda Texas ştatında artilleriya sursatlarının istehsalı müəssisəsinin qurulmasına yönəlmiş layihələrdə də iştirak edir. Kentukkidə inşa edilən TNT zavodu şirkətin ABŞ müdafiə sənayesində artan investisiyalarının mühüm hissələrindən biri hesab olunur.
Sursat istehsal zəncirinin əsas elementlərindən biridir
Trinitrotoluol (TNT) xüsusilə 155 mm çaplı artilleriya sursatları olmaqla çoxsaylı bomba, döyüş sursatı və əl qumbaralarının doldurulmasında istifadə olunan əsas partlayıcı maddələrdən biridir. ABŞ-nin son yerli TNT istehsalı müəssisəsinin bağlanmasından sonra ölkə uzun illər ərzində bu strateji komponenti müttəfiq ölkələrdən idxal edib.
Bu vəziyyət xüsusilə artilleriya sursatlarının istehsalında xarici tədarükçülərdən asılılıq yaradıb.
Sevinc Əliyeva
Ordu.az
