Ordu.az xəbər verir ki, bu barədə “The Guardian” qəzeti məlumat yayıb.

Avropa Şurasının 46 üzv ölkəsinin imzaladığı siyasi bəyannamədə qeyd olunur ki, dövlətlər öz sərhədlərinə nəzarət etmək üçün “mübahisəsiz suveren hüquqa” malikdirlər.

Hazırda Böyük Britaniya İtaliya ilə Albaniya arasında imzalanmış razılaşmaya bənzər müqavilə bağlamağa çalışır. Həmin razılaşma Romaya Albaniyada saxlanma mərkəzləri yaratmağa imkan verib.

Sazişə əsasən, bu mərkəzlər əvvəlcə təhlükəsiz hesab olunan ölkələrdən gələn sığınacaq müraciətçilərinin sənədlərinə baxılması dövründə saxlanılması üçün nəzərdə tutulmuşdu.

Daha sonra Corcia Meloninin hökuməti həmin mərkəzlərdən müraciətləri rədd edilmiş şəxslərin deportasiya məqsədilə saxlanılması üçün istifadə edib.

Yeddi səhifəlik sənəddə qeyd olunur ki, ölkələr “qanunsuz miqrasiyanın qarşısını almaq və onu mümkün qədər cilovlamaq” imkanına malik olmalıdırlar.

Bəyannamədə həmçinin vurğulanır ki, yeni yanaşmalar sırasında beynəlxalq müdafiə müraciətlərinin üçüncü ölkələrdə işlənməsi, üçüncü ölkələrdə “geri qaytarma mərkəzləri”nin yaradılması və tranzit ölkələrlə əməkdaşlıq yer alır.

Sənəd həmçinin dövlətlərə insanları qeyri-insani və alçaldıcı rəftar təhlükəsi olan yerlərə deportasiya etmək üçün daha geniş imkanlar yaratmağı və məhkəmələrin müdaxilə səlahiyyətlərini məhdudlaşdırmağı hədəfləyir.

Sevinc Əliyeva
Ordu.az