Ordu.az xəbər verir ki, bu barədə Çində İran İslam Respublikasının səfiri Rəhmani Fəzli bildirib.

“İran üçün Çin sadəcə iqtisadi tərəfdaş və ya enerji daşıyıcılarının alıcısı deyil. O, təzyiqlərə, təhdidlərə və birtərəfli yanaşmaya qarşı siyasi tarazlaşdırmanın bir hissəsidir”, - deyə Fəzli IRNA-ya müsahibəsində bildirib.

Bəyanat İranın xarici işlər naziri Abbas Əraqçinin Çinə səfərinin nəticələrindən və çərşənbə axşamı günorta ABŞ Prezidenti Donald Trampın Pekinə səfəri ərəfəsində verilib.

Fəzliyə görə, Əraqçinin səfəri İranın ABŞ və İsraillə son qarşıdurmadan sonra diplomatik mövqelərini yenidən nəzərdən keçirmək üçün fəal cəhdlər etdiyi, yalnız hərbi və ya taktiki cavab tədbirləri çərçivəsindən çıxmağa çalışdığı bir vaxtda baş tutub.

“Postmüharibə mərhələsinin idarə olunması məsələsində İran sadəcə müvəqqəti reaksiyalara arxalanmır, əksinə, strateji tərəfdaşlarla qarşılıqlı fəaliyyət vasitəsilə diplomatik düzülüşünü yenidən müəyyən etməyə çalışır”, - deyə IRNA səfirin sözlərini sitat gətirib.

Fəzli əlavə edib ki, Çin böhrana “İran üzərində təzyiq göstərmək mövqeyindən deyil, müharibənin qarşısını almaq və regional təhlükəsizliyin çökməsinə yol verməmək baxımından” yanaşıb.

Pekin Vaşinqton və Tehran arasında potensial vasitəçi kimi nəzərdən keçirilsə də, Fəzli vurğulayıb: “Vasitəçilik İran üzərində təzyiqi idarə etmək alətinə çevrilməməlidir”.

Hörmüz boğazında vəziyyətlə bağlı rəsmi bildirib ki, həmin su yolunda İranın gördüyü təhlükəsizlik tədbirləri müdafiə xarakterlidir və beynəlxalq ticarətə qarşı yönəlməyib.

Qeyd edək ki, Trampın Pekinə səfəri ərəfəsində ABŞ Maliyyə Nazirliyi Çinə “İran neftinin satışı və daşınmasına” kömək etməkdə ittiham olunan 12 fiziki və hüquqi şəxsi qara siyahıya daxil edib.

Sevinc Əliyeva
Ordu.az