Ordu.az xəbər verir ki, bu barədə “Middle East Eye” nəşri məlumat yayıb.
“Middle East Eye” nəşrinin məlumatına görə, ABŞ istehsalı olan hava hücumundan müdafiə sistemlərində yaşanan təhvil gecikmələri və sursat çatışmazlığı səbəbindən region ölkələri Türkiyə ilə yeni təchizat müqavilələri imzalamağa başlayıb.
“SAHA Expo 2026” çərçivəsində keçirilən görüşlərdə Küveyt, Səudiyyə Ərəbistanı, Qətər, Birləşmiş Ərəb Əmirlikləri, Oman və İraqın Türkiyə hava hücumundan müdafiə sistemləri ilə yaxından maraqlandığı bildirilib.
“Middle East Eye”a danışan mənbələrə görə, Körfəz ölkələri mövcud təhlükə mühiti səbəbindən hava hücumundan müdafiə və pilotsuz uçuş aparatlarına qarşı sistemlərin tədarükünə üstünlük verir.
Mənbələrdən biri bildirib ki, “Körfəz ölkələri sanki satınalma yarışına daxil olub. Hətta ənənəvi olaraq neytral siyasət yürüdən Oman belə Türkiyə sistemləri ilə maraqlanır”.
Küveytin müdafiə naziri Şeyx Abdullah Ali Abdullah Əl Sabah “SAHA Expo 2026” zamanı Türkiyə ilə hökumətlərarası satış protokolu imzalayıb.
Razılaşma çərçivəsində Küveytin ASELSAN, HAVELSAN, “Baykar”, “Otokar” və “Yonca-Onuk” Gəmiqayırma Zavodu məhsulları ilə maraqlandığı bildirilib.
Küveytin xüsusilə “Baykar” tərəfindən hazırlanan “Akıncı” zərbə pilotsuz uçuş aparatı və ASELSAN-ın HİSAR hava hücumundan müdafiə sistemlərini qiymətləndirdiyi qeyd olunub.
Müdafiə sənayesi mənbələrinə görə, Səudiyyə Ərəbistanı və Qətər ASELSAN tərəfindən hazırlanan KORKUT 100/25 hava hücumundan müdafiə sistemi üçün müqavilə imzalayıb.
25 mm ağıllı sursat istifadə edən sistem xüsusilə FPV və fiberoptik kabelli pilotsuz uçuş aparatlarına qarşı effektiv həll təqdim edir.
Səudiyyə Ərəbistanının həmçinin SAHA Expo-da təqdim edilən lazerlə yönləndirilən pilotsuz uçuş aparatlarına qarşı sistemlərlə də maraqlandığı qeyd olunub.
İraq Baş Qərargah rəisinin müavini general-leytenant Saad Harbiye ölkəsinin 20 ədəd hava hücumundan müdafiə sisteminin tədarük prosesini yekunlaşdırmaq üzrə olduğunu açıqlayıb.
“Middle East Eye”a danışan mənbələr İraqın da KORKUT hava hücumundan müdafiə sisteminə yönəlməsinin mümkün olduğunu bildirib.
“Patriot” və THAAD hava hücumundan müdafiə sistemləri ilə onlara aid sursatların təhvilində yaşanan uzunmüddətli gecikmələr Körfəz ölkələrini alternativ təchizatçılara yönəldir.
Türkiyə müdafiə sənayesi isə daha qısa təhvil müddəti, ortaq istehsal və texnologiya transferi imkanları ilə ön plana çıxır.
Türkiyə müdafiə sənayesi rəsmilərindən biri bildirib ki, “Türkiyə sistemləri oxşar zaman çərçivəsində təhvil verilə bilir. Uyğun şərait yaranarsa, yerliləşdirmə və birgə inkişaf variantları da təqdim oluna bilir. Region ölkələri bunun getdikcə daha sərfəli təklif olduğunu görür”.
Türkiyə alçaq və orta hündürlük hava hücumundan müdafiə həllərində mühüm uğur qazansa da, ballistik raketdən müdafiə sahəsində işlərini davam etdirir.
SİPER uzun mənzilli hava hücumundan müdafiə sisteminin ballistik raketlərə qarşı tam gücə çatmasının bir neçə il daha çəkə biləcəyi qiymətləndirilir.
Buna baxmayaraq, Körfəz ölkələrinin xüsusilə pilotsuz uçuş aparatları və alçaq hündürlük təhdidlərinə qarşı Türkiyə sistemlərini güclü alternativ kimi gördüyü bildirilir.
Sevinc Əliyeva
Ordu.az
