Ordu.az xəbər verir ki, Bayız sahədə aktiv istifadə olunan sistemlərdən çıxış edilərək hazırlanan “V-Gate” və COM-LINE arxitekturasının müasir döyüş mühitinin əsas tələblərinə cavab verdiyini vurğulayıb.
“Karel Müdafiə Texnologiyaları Qrupu”nun sədri Yavuz Bayız “SavunmaSanayiST.com”a açıqlama verib. “Karel”in köklərinin telefon stansiyaları üzərində qurulduğunu xatırladan Bayız bu infrastrukturun zamanla hərbi sahəyə çevrildiyini bildirib.
Bayız “Karel”in ən böyük iki gücünün Ar-Ge potensialı və yüksək miqyaslı istehsal infrastrukturu olduğunu vurğulayaraq belə deyib:
“Karel”in iki mühüm gücü var. Biri Ar-Ge komandalarına sahib olmasıdır, yəni güclü dizayn potensialı. İkincisi isə çox böyük istehsal müəssisəsi infrastrukturumuzun olmasıdır. Bu müəssisələrdə həm öz cihazlarımızı istehsal edirik, həm də sektorun aparıcı qurumlarına elektron istehsal dəstəyi göstəririk”.
Şirkətin hazırladığı sahra stansiyaları və daxili rabitə sistemləri bu gün həm Türkiyə Silahlı Qüvvələri, həm də müxtəlif ölkələrin orduları tərəfindən aktiv şəkildə istifadə olunur.
Bayız “Karel”in sahra stansiyası sahəsində regional miqyasda önə çıxan istehsalçılardan biri olduğunu vurğulayaraq belə deyib: “İndi bir az da bu yeni nəsil daxili rabitə sistemlərinə innovativ yanaşma gətirək dedik. Məhz bunun nəticəsi olaraq “Karel” “V-Gate”-i dizayn etdik”.
“V-Gate”: Sahra stansiyasının nəqliyyat vasitəsi içinə endirilmiş forması
“Karel”in yeni nəsil həlli “V-Gate” klassik sahra stansiyasının daha kompakt və mobil versiyası kimi ön plana çıxır. Nəqliyyat vasitəsinə inteqrasiya edilən bu sistem üzərindəki şifrəli “Wi-Fi” infrastrukturu sayəsində müxtəlif rabitə elementlərini vahid mərkəzdə birləşdirir.
Sistem analog telefonlar, radiosiqnallar, IP telefonlar, kompüterlər və smartfonlar arasında fasiləsiz rabitə təmin edir. Bununla sahədə qurulan komanda məntəqələrində bütün bölmələr vahid kommutasiya infrastrukturu üzərindən rabitə saxlaya bilir.
COM-LINE: Bütün sistemləri vahid çətir altında toplayan arxitektura
SAHA 2026-da nümayiş etdirilən həllərlə bağlı məlumat verən Bayız nəqliyyat vasitəsi içi rabitə infrastrukturundan komanda mərkəzi həllərinə qədər uzanan yeni nəsil sistemləri sahəyə təqdim etdiklərini bildirib və belə deyib:
“Bu sərgidə çox yenilikçi nəqliyyat vasitəsi içi həllərimizi nümayiş etdiririk. Bununla yanaşı komanda mərkəzlərində istifadə ediləcək həllərimiz də var”.
“Karel”in “V-GATE” texnologiyası ilə dəstəklənən nəqliyyat vasitəsi daxili inteqrasiya olunmuş şəbəkə keçidi həlli COMLINE sisteminə dair detalları paylaşan Yavuz Bayız bu həllin təkcə avadanlıq deyil, eyni zamanda proqram əsaslı inteqrasiya arxitekturası təqdim etdiyini bildirib və belə deyib:
“Bu struktur sayəsində sahədən alınan pilotsuz uçuş aparatı görüntülərini anlıq şəkildə komanda mərkəzinə ötürə bilirsiniz. Yəni sahədəki bütün məlumat və səs trafikinı vahid rəqəmsal ekosistem içində toplayırıq”.
Sistemin təqdim etdiyi uzaqdan giriş qabiliyyətinə də toxunan Bayız müasir əməliyyat meydanına uyğun çevik istifadə imkanı təqdim etdiklərini vurğulayaraq belə deyib:
“Personal nəqliyyat vasitəsindən ayrıldıqda belə sistemlə əlaqəsini itirmir. Nəqliyyat vasitəsi içindəki radioaparatları və digər sistemləri planşet və ya smartfon vasitəsilə uzaqdan idarə edə bilirsiniz. Bu da xüsusilə sahədə daha qorunan ərazilərdən əməliyyat aparmaq ehtiyacına birbaşa cavab verir”.
COMLINE sistemi avadanlıq və proqram qatlarını çevik bir strukturda bir araya gətirir, müxtəlif rabitə protokolları və elektron alt sistemlər arasında inteqrasiya təmin edir, təhlükəsiz və fasiləsiz səs, məlumat və görüntü rabitəsi təqdim edir.
Bundan əlavə, sistem “Karel”in Əməliyyat Başlıq Komandası MOBAT başda olmaqla geyilə bilən texnologiyalarla tam uyğun işləyir və “Karel”in 5G Özəl Mobil Şəbəkə həlli COMBAT ilə inteqrasiya olunaraq əməliyyat rabitəsini bütün sahəyə yayır.
Sürü pilotsuz uçuş aparatı əməliyyatlarında kritik rol
Rabitənin müasir döyüş meydanındakı həlledici roluna diqqət çəkən Bayız sürü pilotsuz uçuş aparatı konsepsiyasının tamamilə məlumat axınından asılı olduğunu bildirərək belə deyib:
“Sürü pilotsuz uçuş aparatı əməliyyatlarında rabitə olmadan heç nə olmaz. Pilotsuz uçuş aparatlarının bir-biri ilə danışması, yerdən komanda alması, görüntünün komanda mərkəzinə ötürülməsi, bütün bunlar fasiləsiz rabitə infrastrukturu tələb edir. Buna görə COM-LINE kimi sistemlər əslində döyüş meydanının görünməyən sütunudur”.
“Karel”in mühəndislik gücü
Dəniz platformalarına yönəlik işlər barədə də məlumat verən Bayız “Karel”in döyüş gəmiləri üçün rabitə sistemlərini inteqrasiya olunmuş süit strukturu ilə təqdim edə bildiyini bildirib. Şirkətin eyni zamanda yerli müdafiə sənayesi müəssisələrinə elektron istehsal dəstəyi göstərməyə davam etdiyini deyən Bayız istehsal tərəfinin “Karel”in ən güclü cəhətlərindən biri olduğunu vurğulayıb.
“Karel Müdafiə Texnologiyaları”nın yalnız rabitə deyil, kritik alt sistem dizaynlarında da fəal rol oynadığını bildirən Bayız belə deyib:
“Biz elektron dizayn qabiliyyəti olan bir şirkətik. Bu çərçivədə milli döyüş təyyarəsi, “Hürkuş” və ATAK-2 üçün “Backup Flight Instrument”, yəni ehtiyat uçuş göstəricisi hazırlayırıq. Bununla yanaşı “Chaff/Flare” əks-tədbir sistemlərində və TEI üçün hazırladığımız PD-170 mühərrikinin FADEC blokunda da iştirak edirik”.
Bayız FADEC sistemində seriyalı istehsala keçildiyini və təhvil prosesinin davam etdiyini də sözlərinə əlavə edib.
Sevinc Əliyeva
Ordu.az
