Ordu.az xəbər verir ki, bu barədə “Defensehere” nəşri məlumat yayıb.

Şirkətin sahibi Dərya Kürkçüoğlu məhsulların texniki xüsusiyyətləri və istifadə sahələri barədə məlumat verib.

1990-cı ildən etibarən ölkə daxilində və xaricdə fəaliyyət göstərən şirkət istehsal etdiyi məhsullarla Türkiyə müdafiə sənayesi məhsullarının keyfiyyətinin və tanınmasının artırılmasına, həmçinin ölkə iqtisadiyyatına və sektorun rəqabət qabiliyyətinə töhfə verməyi hədəfləyir.

Dərya Kürkçüoğlu bildirib ki, təqdim edilən GÖKKURT modellərindən ikisi patentləşdirilmiş və orijinal dizayna malikdir. Onun sözlərinə görə, məhsullar tamamilə alüminium gövdə ilə hazırlanıb. Tətik qoruyucusu da daxil olmaqla bir çox hissə alüminiumdan istehsal olunub. Hərəkətli və üçpilləli qundaq sistemi ilə hazırlanan silahların hərbi standartlara uyğun istehsal edildiyi vurğulanıb.

Kürkçüoğlu qeyd edib ki, silahların lülə və mexanizm hissələrində yüksək davamlılıq təmin edən 4140 markalı poladdan istifadə olunub. Gövdənin istehsalında isə müdafiə sənayesində geniş istifadə edilən 7000 seriyalı alüminium tətbiq edilib.

Onun sözlərinə görə, məhsul müxtəlif əməliyyat ehtiyaclarına uyğunlaşdırıla bilir. Lülənin uzunluğu 61 santimetrədək artırıla bilər ki, bu da silahın həm Pilotsuz Uçuş Aparatlarına (PUA) qarşı istifadəsinə, həm də qapalı məkan əməliyyatları və sahə tapşırıqlarında effektivliyinə imkan yaradır.

Şirkətin hazırladığı digər model isə xüsusilə PUA təhdidlərinə qarşı istifadə üçün nəzərdə tutulub. “Üçbucaq lülə” adlandırılan bu model yüksək divar qalınlığına malik xüsusi lülə quruluşu ilə hazırlanıb. Lülənin 4140 markalı poladdan istehsal edildiyi və daxili çapının PUA sursatlarına uyğun layihələndirildiyi bildirilib.

Tamamilə alüminium gövdəyə malik olan modelin əsasən hərbi istifadəçilər tərəfindən seçildiyi qeyd olunub. Üstdən təhlükəsizlik sisteminə malik tüfəng müxtəlif qundaq variantları ilə də istifadə oluna bilir.

Standart olaraq 4+1 patron tutumu ilə təqdim edilən modelin darağı uzadılaraq daha yüksək tutum əldə edilə bilər. Məhsulların müxtəlif əməliyyat ssenarilərinə uyğun fərdiləşdirilə bildiyi vurğulanıb.

Yerli istehsal və orijinal dizayn konsepsiyası ilə fəaliyyətini davam etdirən “Kürkçüoğlu Silah ve Savunma Sanayi” hazırladığı yeni nəsil sistemlərlə müdafiə sənayesində mövqeyini daha da gücləndirməyi hədəfləyir.


Sevinc Əliyeva
Ordu.az