Ordu.az xəbər verir ki, sözügedən razılaşma təyyarənin sualtı qayıqlara qarşı mübarizə qabiliyyətlərini inkişaf etdirməyə yönəlmiş yeni nəsil yüksəltmə paketinin inteqrasiyasını ehtiva edir.
“Increment 3” paketi ilə qabiliyyət artımı
Razılaşma çərçivəsində bir ədəd P-8A “Poseidon” təyyarəsinə “Increment 3” modernizasiya dəsti inteqrasiya ediləcək. Bu yüksəltmə paketi xüsusilə platformanın sualtı qayıqları aşkar etmə və izləmə qabiliyyətlərini artırmağa yönəlib.
Müqavilənin mövcud xərclər üstəgəl sabit ödənişli (cost-plus-fixed-fee) razılaşma çərçivəsində opsiyadan istifadə olunmaqla qüvvəyə mindiyi bildirilib. Layihə çərçivəsində həm dəst inteqrasiyası, həm də texniki dəstək fəaliyyətləri yer alır.
İşlərin 2026-cı il oktyabr ayında tamamlanması planlaşdırılır, müqavilə dəyərinin tamamilə 2026-cı maliyyə ili büdcəsindən qarşılandığı və bu vəsaitlərin ilin sonunda qüvvədə qalacağı qeyd olunub.
Üç fərqli məkanda həyata keçiriləcək
Modernləşdirmə fəaliyyətlərinin böyük hissəsi Florida ştatının Ceksonvill şəhərində həyata keçiriləcək.
İş bölgüsü belə açıqlanıb:
Ceksonvill, Florida: 79,6%
Sent-Luis, Missuri: 10,9%
Mesa, Arizona: 9,5%
Ceksonvill P-8A parkının Şərq Sahilindəki əsas əməliyyat və texniki xidmət mərkəzlərindən biri kimi önə çıxır.
P-8A “Poseidon”un rolu və qabiliyyətləri
P-8A “Poseidon” ABŞ donanmasının əsas dəniz patrul və kəşfiyyat platforması kimi xidmət göstərir. “Boeing 737-800ERX” platforması üzərində hazırlanan təyyarə P-3C “Orion” parkını əvəz edib.
Platforma səth axtarış radarı, elektro-optik/infraqırmızı sensorlar və “sonoboy” sistemləri ilə geniş ərazilərdə sualtı qayıqları aşkar edə bilir. Eyni zamanda torpedo və gəmi əleyhinə raket daşıma qabiliyyəti sayəsində həm sualtı, həm də suüstü hədəflərə qarşı nişanalma qabiliyyətinə malikdir.
Davamlı modernləşdirmə strategiyası
“Increment 3” yüksəltməsi P-8A proqramında tətbiq olunan mərhələli modernləşdirmə yanaşmasının bir hissəsi kimi önə çıxır. ABŞ donanması yeni istehsal platformalarını gözləmək əvəzinə, mövcud təyyarələri modernizasiya dəstləri ilə yeniləyərək əməliyyat qabiliyyətlərini daimi şəkildə aktual saxlamağı hədəfləyir.
Bu yanaşma erkən istehsal olunmuş təyyarələrin texnoloji baxımdan geridə qalmasının qarşısını alarkən, parkın ümumi effektivliyini artırmağı hədəfləyir.
Artan sualtı qayıq təhdidinə qarşı kritik addım
Son illərdə xüsusilə Çin və Rusiyanın sualtı qayıq parklarında qeydə alınan inkişaflar sualtı qayıqlara qarşı mübarizə qabiliyyətlərinin əhəmiyyətini artırıb. Daha səssiz və daha qabaqcıl platformalara qarşı effektivlik təmin etmək üçün P-8A parkının modernləşdirilməsi əməliyyat zərurəti kimi qiymətləndirilir.
Bu çərçivədə həyata keçirilən yüksəltmənin ABŞ donanmasının erkən aşkar etmə, izləmə və müdaxilə qabiliyyətini gücləndirməsi gözlənilir.
Müqavilə birbaşa “Boeing”ə verildi
Müqavilənin rəqabətə açılmadan mövcud razılaşma üzərindən icra olunması platformanın orijinal istehsalçısı olan “Boeing”in inteqrasiya prosesindəki kritik rolu ilə əlaqələndirilir. Yeni avadanlıq və proqram təminatının mövcud sistemlərə inteqrasiyası yüksək mühəndislik tələb etdiyindən, bu cür modernləşdirmələrin əsas yükənici tərəfindən həyata keçirilməsi standart təcrübə kimi önə çıxır.
Sevinc Əliyeva
Ordu.az
