Ordu.az xəbər verir ki, bu barədə “BBC News” məlumat yayıb.

Çiuaua ştatının rəsmilərinin sözlərinə görə, onlar meksikalı iki rəsmi ilə birlikdə qanunsuz narkotik laboratoriyalarının məhv edilməsi əməliyyatından qayıdarkən avtomobillərinin qəzaya uğraması nəticəsində həlak olublar.

Şeynbaum bildirib ki, nə o, nə də federal təhlükəsizlik üzrə yüksək vəzifəli rəsmilər ABŞ-Meksika birgə əməliyyatları barədə məlumatlı olublar. Meksika lideri israr edib ki, xarici rəsmilər Meksika ərazisində yalnız əvvəlcədən federal razılıq əsasında fəaliyyət göstərə bilərlər.

Şeynbaum qeyd edib: “Biz Çiuaua ştatı ilə ABŞ səfirliyinin əməkdaşları arasında hər hansı birbaşa əməkdaşlıqdan xəbərdar olmamışıq”. O, həmçinin deyib ki, hökumət “bunun hansı şəraitdə baş verdiyini anlamalı, sonra hüquqi nəticələri qiymətləndirməlidir”.

Çiuaua ştatının rəsmisinin sözlərinə görə, bazar günü səhər ABŞ-nin iki vətəndaşı və Çiuaua ştatının İstintaq Agentliyinin iki əməkdaşı onları aparan avtomobilin yoldan çıxaraq dərəyə düşməsi və orada partlaması nəticəsində ölüb.

Meksikadakı ABŞ səfiri Ronald Conson iki amerikalı vətəndaşı “ABŞ səfirliyinin əməkdaşları” adlandırıb. Çiuaua ştatının baş prokuroru Sezar Xaureqi bazar günü keçirdiyi mətbuat konfransında bildirib ki, ölənlər ABŞ səfirliyinin “təlimatçı zabitləri” idi və onlar “ABŞ hakimiyyət orqanları ilə aramızda olan ümumi və adi əlaqələr çərçivəsində təlim keçirdilər”.

O əlavə edib ki, qəza onların bir neçə gizli sintetik narkotik laboratoriyasının məhv edildiyi əməliyyatdan qayıtdığı vaxt baş verib.

Sevinc Əliyeva
Ordu.az