Ordu.az xəbər verir ki, Tramp bunu “Axios”a müsahibəsində bildirib.
“Yaxşı bir şans var, amma əgər onlar razılaşmasalar, hər şeyi partladacağam”, - deyə o bildirib.
Məqalənin müəllifi Barak Ravidin sözlərinə görə, vasitəçilər razılaşmanın yaxın olmasına o qədər də nikbin deyillər, lakin Trampın ultimatumunun təxirə salınması ilə bağlı ən azı qismən razılığa gəlmək üçün son dəqiqəyə qədər çalışacaqlarını bildirirlər.
ABŞ prezidenti İran liderləri ilə razılığa gələ bilməsə, İranın mülki əhalisi üçün həyati əhəmiyyət kəsb edən infrastrukturu məhv etməklə hədələyib.
“Axios”un bunun günahsız İran vətəndaşlarına zərər verəcəyindən narahat olub-olmadığı barədə sualına Tramp cavab olaraq bildirib ki, öz hökumətinə qarşı çıxan vətəndaşların “rejimi zəiflətmək üçün” bu cür zərbələri dəstəkləyəcəklərinə inanır.
Tramp deyib: “Onlar qorxu içində yaşayırlar. Müharibənin qızğın vaxtında gedəcəyimizdən qorxurlar, amma getməyəcəyik”.
8 dəqiqəlik telefon danışığı zamanı Tramp “Axios”a bildirib ki, onun elçiləri Stiv Uitkof və Cared Kuşner İran tərəfi ilə intensiv danışıqlar aparırlar.
Danışıqlarda iştirak edən iki mənbə bildirib ki, məsləhətləşmələr Pakistan, Misir və Türkiyə tərəfindən, eləcə də Trampın müşavirləri ilə İranın xarici işlər naziri Abbas Əraqçi arasında SMS vasitəsilə həyata keçirilir.
Tramp deyib: “Danışıqlar yaxşı gedir, amma iranlılarla heç vaxt nəticəyə gələ bilmirsiniz”.
O, bir neçə gün əvvəl ABŞ və İranın birbaşa danışıqlar aparmaq barədə razılığa gəlməyə yaxın olduğunu açıqladı.
Tramp çərşənbə günü Tehranı Şimali İranda Kərəc ilə birləşdirən körpüyə edilən zərbəyə toxunaraq deyib: “Amma sonra beş gün ərzində bizimlə görüşəcəklərini dedilər. Ona görə də dedim ki, niyə beş gün? Mən onların ciddi olmadığını hiss etdim. Buna görə də körpüyə zərbə endirdim”.
Vasitəçilik səyləri ilə tanış olan iki mənbə bildirib ki, Pakistan, Misir və Türkiyənin xarici işlər nazirləri Trampın ultimatumunun uzadılmasına və tərəfləri görüşə yaxınlaşdıra biləcək etimad quruculuğu tədbirləri paketi barədə razılığa gəlməyə çalışırlar.
Üç nazir şənbə günü Uitkof və Əraqçi ilə telefonla məsələ ilə bağlı danışıblar, lakin heç bir irəliləyiş əldə edilməyib. Son on gündür ki, ABŞ və İran Hörmüz boğazının açılması müqabilində atəşkəs barədə razılığa gəlməyə çalışaraq Pakistan, Misir və Türkiyə vasitəsilə dolayı danışıqlar aparırlar. Lakin heç bir əhəmiyyətli irəliləyiş əldə edilməyib.
Bazar günü səhər yerli vaxtla, “Axios” ilə telefon müsahibəsindən qısa müddət əvvəl Tramp İran Hörmüz boğazını açmasa, çərşənbə axşamı günündən etibarən İranın elektrik stansiyalarını və körpülərini bombalayacağı ilə hədələdi.
Daha sonra Tramp sosial şəbəkədə yenidən paylaşım edərək yalnız vaxtı göstərdi: Çərşənbə axşamı, saat 20:00, ABŞ-nin Şərq Sahili vaxtı ilə.
Sevinc Əliyeva
Ordu.az
