Ordu.az xəbər verir ki, bu barədə Ağ Evin yüksək rütbəli rəsmisi bildirib.
"Onların cavab verəcəklərini bilirdik. Süleymani öldürüldükdən sonra da eyni hadisə baş verib", - deyə o, 2020-ci ildə ABŞ-nin zərbəsi nəticəsində iranlı general Qasem Süleymaninin öldürülməsinə stinadən bildirib.
Mənbə bildirib ki, prezident Donald Tramp zərurət yaranarsa, ABŞ-nin regionda hərbi əməliyyatlarını gücləndirməyə hazırdır.
Qeyd edək ki, İran ABŞ-nin Qətər və İraqdakı bazalarına raket zərbələri endirib.
İranın ABŞ hərbi bazalarına qarşı əməliyyatı “Qələbə müjdəsi” adlanır.
Bundan əvvəl İslam İnqilabı Keşikçiləri Korpusu (SEPAH) ABŞ-ın Qətərdəki bazasına hücumla bağlı bəyanat yayıb.
"Amerika Birləşmiş Ştatlarının cinayətkar rejiminin İran İslam Respublikasının dinc nüvə obyektlərinə qarşı açıq-aşkar hərbi təcavüzü və beynəlxalq hüququn kobud şəkildə pozulmasına cavab olaraq, Ali Milli Təhlükəsizlik Şurasının qərarı ilə və “Xatəmül-Ənbiya” Mərkəzi Komandanlıq Qərargahının rəhbərliyi altında İslam İnqilabı Keşikçiləri Korpusu (SEPAH) Qətərdəki Əl-Udeyd bazasına güclü raket zərbəsi endirib", - deyə bəyanatda bildirilib.
Qətərin Müdafiə Nazirliyi İranın Əl-Udeyd aviabazasını hədəf alan raket hücumunun uğurla dəf edildiyini bildirib.
"Allahın köməkliyi və hərbi qulluqçularımızın yüksək hazırlığı sayəsində hücum operativ şəkildə zərərsizləşdirilib. Hadisə nəticəsində itki və xəsarət alan olmayıb", - məlumatda deyilir.
Ordu.az
