Ordu.az xəbər verir ki, bu barədə Ukrayna Təhlükəsizlik Xidməti məlumat yayıb.

Hədəflər Rusiya Hərbi Dəniz Qüvvələri üçün inşa edilən “Layihə 15310”a məxsus “Volqa” və “Vyatka” kabeldöşəyən gəmiləri, eləcə də “Petropavlovsk” sərnişin və yük bərəsi olub.

UTX bildirib ki, əməliyyat bir gün əvvəl Ukrayna Prezidenti Volodimir Zelenski tərəfindən təsdiqlənmiş Rusiyaya qarşı 40 günlük kampaniya çərçivəsində həyata keçirilib.

Qurumun məlumatına görə, PUA zərbələri nəticəsində hər üç gəmidə güclü yanğın baş verib. Hücum zamanı “Petropavlovsk” bərəsinin yüklənmə səviyyəsi 96 faiz təşkil edib.

UTX qeyd edib ki, “Volqa” və “Vyatka” gəmiləri Rusiyanın sualtı hərbi kəşfiyyat məqsədilə istifadə etdiyi “Qarmoniya” hidroakustik müşahidə sisteminin yerləşdirilməsi üçün nəzərdə tutulub.

Bundan əlavə, bu gəmilər gəmiləri, sualtı boru kəmərlərini, rabitə kabellərini və digər kritik infrastrukturu məhv etmək üçün nəzərdə tutulmuş təmassız dəniz minalarını da yerləşdirə bilir.

Ukrayna Təhlükəsizlik Xidmətinin məlumatına görə, bu gəmilərin hər birinin dəyəri yüz milyonlarla dollar təşkil edir.

Militarnyi daha əvvəl NASA-nın FIRMS peyk monitorinq sistemi vasitəsilə Kerçdəki “Zaliv” gəmiqayırma zavodunun ərazisində yanğının qeydə alındığını xəbər vermişdi.

Gecə saatlarında yerli sakinlər şəhərdə ardıcıl partlayışlar və atəş səsləri eşitdiklərini bildiriblər. Şəhərin müxtəlif hissələrində güclü tüstü qoxusunun hiss olunduğu qeyd edilib.

Şahidlər həmçinin Rusiya hava hücumundan müdafiə sistemlərinin fəaliyyət göstərdiyini bildiriblər.

“Zaliv” gəmiqayırma zavodu işğal altındakı Krımın ən iri gəmiqayırma müəssisələrindən biridir və Rusiya işğalı başlayandan etibarən ölkənin hərbi proqramlarının icrasında fəal iştirak edir.

Sevinc Əliyeva
Ordu.az