Ordu.az xəbər verir ki, Fransa Müdafiə Nazirliyinin Silahlanma Baş İdarəsi (DGA) 2026-cı il iyunun 2-də MBDA şirkəti ilə dördüncü nəsil “hava-yer” nüvə raketi ASN4G layihəsinin hazırlanması və tədarükü ilə bağlı çərçivə sazişi imzalayıb.

Məlumata görə, ASN4G raketinin təxminən 2035-ci ildə silahlanmaya qəbul edilməsi planlaşdırılır.

Layihə Fransa nüvə çəkindirmə qüvvələrinin hər iki əsas komponentini, yəni Strateji Hava Qüvvələrini (FAS) və Dəniz Nüvə Aviasiya Qüvvələrini (FANu) əhatə edir.

Yeni raket öz əməliyyat tapşırıqlarını Rafale F5 qırıcıları vasitəsilə yerinə yetirəcək.

ASN4G istismar müddətini başa vurmaq üzrə olan və ya artıq köhnəlmiş ASMPA sistemlərini əvəz edərək Fransanın nüvə doktrinasında hava komponentinin modernləşdirilməsində əsas rol oynayacaq.

Layihənin ən mühüm xüsusiyyəti onun hipersəs sürətinə malik olmasıdır.

Fransa inkişaf edən hava hücumundan müdafiə sistemləri və mürəkkəbləşən təhlükə mühiti fonunda çəkindirmə qabiliyyətinin etibarlılığını qorumaq məqsədilə bu raket vasitəsilə texnoloji sıçrayış etməyi hədəfləyir.

DGA nümayəndələri bildiriblər ki, ASN4G layihəsi yalnız müdafiə sənayesi müqaviləsi deyil, həm də dünyada çox az ölkənin sahib olduğu qabaqcıl texnoloji və sənaye potensialının göstəricisidir.

Qeyd olunur ki, layihə Fransanın strateji müstəqilliyini qorumaq və dəyişən müharibə şəraitinə uyğunlaşmaq siyasətinin tərkib hissəsidir.

Sevinc Əliyeva
Ordu.az