Ordu.az xəbər verir ki, bu barədə KONGSBERG məlumat yayıb.

Məlumata görə, ABŞ tənzimləyici qurumlarının təsdiq prosesinin tamamlanmasından sonra Kaliforniya ştatında yerləşən raket istehsalçısı rəsmi olaraq KONGSBERG-in tərkibinə daxil olub.

Şirkət bu addımla qlobal bazarda yüksək həcmdə və aşağı xərc ilə sursat istehsalı imkanlarını genişləndirməyi hədəfləyir. Bildirilir ki, son illərdə baş verən münaqişələr böyük miqyaslı və sürətli sursat tədarükünə ehtiyacın artdığını göstərib və sözügedən satınalma məhz bu tələbatı qarşılamağa yönəlib.

“Zone 5 Technologies” tərəfindən hazırlanmış “Rusty Dagger” uzaqmənzilli hücum raketi və “White Spike” hava hücumundan müdafiə raketi şirkətin əsas məhsulları sırasında yer alır. Bu sistemlərin KONGSBERG portfelinə inteqrasiyası şirkətə hava hücumundan müdafiə və zərbə sistemləri sahəsində daha çevik həllər təqdim etməyə imkan verəcək.

KONGSBERG-in prezidenti və baş icraçı direktoru Eyrik Li bildirib ki, son münaqişələr yüksək həcmli müdafiə imkanlarının nə qədər vacib olduğunu açıq şəkildə nümayiş etdirib.

Onun sözlərinə görə, “Zone 5 Technologies” sürətli istehsal və genişmiqyaslı istehsal sahəsində özünü sübut edib və şirkətin beynəlxalq genişlənməsi dəstəklənəcək.

Satınalmadan sonra “Zone 5 Technologies” müstəqil törəmə şirkət kimi fəaliyyətini davam etdirəcək. Şirkət ABŞ Hərbi Hava Qüvvələrinin AGM-188 FAMM proqramında və onun ixrac versiyası olan ERAM layihəsində iştirakını da qoruyacaq.

Bundan əlavə, şirkətin ABŞ Müdafiə Nazirliyinin digər strukturları, Müdafiə İnnovasiyaları Bölməsi və Hərbi Hava Qüvvələri Araşdırma Laboratoriyası ilə əməkdaşlığı davam edəcək. Müqavilənin maliyyə dəyəri açıqlanmasa da, KONGSBERG-in şirkətin 90 faiz səhmini əldə etdiyi bildirilib.

“Zone 5 Technologies”in təsisçisi və baş direktoru Tomas Akers, eləcə də hazırkı idarəetmə komandası vəzifələrində qalacaq və şirkətdə pay sahibi olaraq fəaliyyətlərini davam etdirəcəklər.

Sevinc Əliyeva
Ordu.az