Ordu.az xəbər verir ki, HAVELSAN tərəfindən 2003-cü ildə hazırlanmağa başlanılan və 2007-ci ildən etibarən Türkiyə Hərbi Hava Qüvvələrində aktiv istifadə olunan Eskadrilya Səviyyəli Missiya Planlaşdırma Proqramı Hərbi Hava Qüvvələrinin kritik əməliyyat ehtiyacları üçün milli, etibarlı və yüksək imkanlı həll kimi ön plana çıxır.
Sistem döyüş təyyarələri ilə yanaşı, təlim, nəqliyyat, erkən xəbərdarlıq və idarəetmə (AWACS) kimi müxtəlif hava platformalarının missiya planlaşdırılması və missiyadan sonrakı qiymətləndirmə və analiz prosesləri üçün geniş imkanlar təqdim edir.
Coğrafi İnformasiya Sistemi (GIS) dəstəyi, marşrut və naviqasiya planlaşdırılması, uçuş performans hesablamaları, MEA/MSA/ESA analizləri, təhdid və risk analizləri, klassik sursat hücum planlamaları, sursat interfeyslərinin inteqrasiyası, missiya sınaqları, məlumatların yüklənməsi və boşaldılması, həmçinin missiyadan sonrakı analiz imkanları ilə sistem tam missiya planlaşdırma infrastrukturu təmin edir.
Bununla yanaşı, proqram Hərbi Hava Qüvvələri İnformasiya Sistemi ilə tam inteqrasiya şəraitində işləyə bilir. Hava tapşırıqları, hava məkanı məlumatları, meteoroloji göstəricilər, NOTAM bildirişləri və kəşfiyyat məlumatlarının planlaşdırma prosesində istifadəsinə imkan verir. Sistem eyni zamanda şəbəkədən asılı olmayan müstəqil istifadə qabiliyyətinə malikdir. Hərbi Hava Qüvvələri İnformasiya Sistemi ilə inteqrasiya işləri isə davam edir.
ÖZGÜR Layihəsi Türkiyənin müdafiə sənayesində xarici asılılığı azaltmaq məqsədilə həyata keçirilən proqramların mühüm hissələrindən biridir.
Layihə çərçivəsində struktur təkmilləşdirmələri ilə yanaşı, F-16 təyyarələrinə milli və yerli imkanlarla hazırlanmış avionika sistemləri və sursatlar inteqrasiya olunur. Məqsəd F-16-ların daha müasir və daha yüksək imkanlara malik şəkildə Hərbi Hava Qüvvələrinin xidmətində qalmasını təmin etməkdir.
HAVELSAN tərəfindən hazırlanmış Missiya Planlaşdırma Proqramının da ÖZGÜR Layihəsi çərçivəsində qəbul prosesi uğurla tamamlanıb. Layihə çərçivəsində TEBER kimi milli ağıllı sursatların missiya planlaşdırma proqramları da hazırlanıb. Bundan əlavə, HGK, KGK, SOM və TOLUN sursatlarının sistemə inteqrasiyası uğurla həyata keçirilib.
Missiya planlaşdırma imkanları HÜRKUŞ, HÜRJET və KAAN platformalarında da tətbiq olunur və milli aviasiya ekosisteminin müxtəlif elementlərinə inteqrasiya edilməyə davam edir.
Müdafiə texnologiyalarında xarici asılılığı azaldan bu kritik imkanlar Türkiyənin milli aviasiya və müdafiə sənayesinin rəqəmsal transformasiyasında mühüm mərhələ hesab olunur.
Sevinc Əliyeva
Ordu.az
