Eyni zamanda İsrail, elan edilmiş atəşkəsə baxmayaraq, Livan ərazisinə zərbələr endirməyə davam edir ki, bu da atəşin dayandırılması rejiminin faktiki şəkildə pozulduğunu göstərir.

Ümumilikdə region uzunmüddətli eskalasiya vəziyyətində qalır və gərginliyin daha da artması riski saxlanılır.

Ordu.az hələlik cümə axşamı gecəsi Yaxın Şərqdə baş vermiş əsas hadisələrin qısa icmalını təqdim edir.

ABŞ silahlı qüvvələri cümə axşamı gecəsi İran ərazisində yerləşən adı açıqlanmayan obyektə hücum edib. Bu barədə CNN məlumat yayıb. Telekanalın ABŞ rəsmisinə istinadən verdiyi xəbərə görə, hədəf ABŞ qüvvələri və kommersiya gəmiçiliyi üçün təhlükə yaradan obyekt olub. Lakin obyektin xarakteri, yerləşdiyi yer və zərbələrin nəticələri açıqlanmır.

ABŞ ordusu İran tərəfindən guya buraxılmış dörd pilotsuz uçuş aparatını, eləcə də onların buraxılış məntəqəsini məhv edib. Bu barədə mayın 27-də “X” sosial şəbəkəsində Axios portalının jurnalisti Barak Ravid yazıb. “Yüksək vəzifəli ABŞ rəsmisi bildirib ki, İran ABŞ-yə məxsus kommersiya gəmisinin istiqamətinə dörd pilotsuz uçuş aparatı buraxıb”, - deyə paylaşımda qeyd olunub.

ABŞ Maliyyə Nazirliyi çərşənbə günü Hörmüz boğazında gəmiçiliyə nəzarət edən yeni yaradılmış İran qurumuna sanksiya tətbiq edib. Nazirliyin saytında yayılan açıqlamada qeyd olunub ki, “Persiya körfəzi məsələləri üzrə idarə, İran” Xarici Aktivlərə Nəzarət İdarəsinin (OFAC) SDN siyahısına daxil edilib.

İranla hərbi qarşıdurma zamanı ABŞ-nin istifadə etdiyi raket ehtiyatlarının bərpası üçün üç il və ya daha çox vaxt tələb oluna bilər. Bu nəticə Amerika Strateji və Beynəlxalq Araşdırmalar Mərkəzinin (CSIS) yenilənmiş məlumatlarından irəli gəlir.

Sevinc Əliyeva
Ordu.az