Ordu.az xəbər verir ki, bu barədə Hindistanın Müdafiə Tədqiqatları və İnkişafı Təşkilatı (DRDO) məlumat yayıb.

Bildirilib ki, raketin buraxılışı Hindistanın şərqindəki Odişa ştatının sahilləri yaxınlığında, Benqal körfəzində yerləşən hərbi poliqondan həyata keçirilib.

Məlumata görə, modernləşdirilmiş raket uçuş sınaqları zamanı müxtəlif tipli döyüş başlıqları daşıyıb və onların vasitəsilə Hind okeanının geniş ərazisində yerləşən bir neçə ayrı hədəf uğurla məhv edilib.

DRDO-dan bildirilib ki, təkmilləşdirilmiş “Agni” raketinin uçuş trayektoriyası bir neçə quru və gəmi stansiyası vasitəsilə izlənilib.

Komanda məntəqələri buraxılış anından bütün döyüş bloklarının düşməsinə qədər telemetrik məlumatlar əldə edib və sınaqlar zamanı bütün tapşırıqlar tam həcmdə yerinə yetirilib.

“Bu uğurlu sınaqla Hindistan bir raket sistemi vasitəsilə eyni anda bir neçə strateji hədəfi vurmaq qabiliyyətini bir daha nümayiş etdirib”, - deyə “The Economic Times” nəşri yazıb.

“India Today” telekanalının məlumatına görə, məxfi raketin uçuşu səmada qeyri-adi mənzərəni görən şahidlərin çəkdiyi çoxsaylı videolarda qeydə alınıb.

“Səmanı yararaq keçən, uzun, dolama, narıncı-ağ quyruqlu kometanı xatırladan parlaq obyekt təkcə Odişa ştatında deyil, həm də buraxılış məntəqəsindən yüzlərlə kilometr uzaqda yerləşən ərazilərdə, o cümlədən Banqladeşdə müşahidə olunub”, - deyə məlumatda qeyd edilib.

Sevinc Əliyeva
Ordu.az