Ordu.az xəbər verir ki, bu barədə bu gün Aİ Şurasının iclasının başlamasından əvvəl Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas bildirib.

O vurğulayıb ki, əsas problem Moskvanın aqressiv davranışıdır və beynəlxalq ictimaiyyət bu ekspansiyanı cilovlamağın effektiv yolunu tapmalıdır.

“Rusiya ilə hər hansı bir mövzuya toxunmazdan əvvəl biz əvvəlcə öz aramızda dəqiq olaraq onlarla nə barədə danışmaq istədiyimizi müzakirə etməliyik”, - deyə Avropa diplomatiyasının rəhbəri bildirib.

Kallas qeyd edib ki, xarici işlər nazirlərinin qarşıdakı görüşləri məhz mövcud təhlükəsizlik problemlərinin həllinə dair konkret təkliflərin hazırlanmasına həsr olunacaq.

O diqqətə çatdırıb ki, əsas təhlükə regionun sabitliyinin pozulması olaraq qalır: “Avropa təhlükəsizliyinin problemi ondadır ki, Rusiya daim öz qonşularına hücum edir və bizim bunu necə dayandıra biləcəyimizi anlamamız lazımdır”.

Ali nümayəndə həmçinin bildirib ki, Avropada uzunmüddətli sülh və sabitliyə nail olmaq üçün Kremlin həyata keçirdiyi ciddi güzəştlər də vacibdir. Şərtlərdən biri kimi Kallas qonşu dövlətlərin ərazilərindən Rusiya qoşunlarının çıxarılmasını qeyd edib və buna nümunə kimi Moldovanı göstərib.

Onun sözlərinə görə, Avropa liderləri hazırda Rusiyaya qarşı tələb siyahısı üzərində işləyirlər və bu sənəd qitədə təhlükəsizliyin təmin edilməsinin əsasına çevriləcək. “Bizə sabitlik zəmanətləri lazımdır və qoşunların çıxarılması sülh içində Avropa üçün zəruri şərtlərdən yalnız biridir”, - deyə Kaya Kallas sözlərini yekunlaşdırıb.

Sevinc Əliyeva
Ordu.az