Ordu.az xəbər verir ki, Polşanın müdafiə nazirinin müavini və müdafiə naziri Vladislav Kosinyak-Kamış ölkənin 12-ci F-35A təyyarəsinin yer və uçuş sınaqlarını tamamlayaraq təhvila hazır vəziyyətə gəldiyini açıqlayıb.
Kosinyak-Kamış “X” sosial media platformasında etdiyi paylaşımda istehsal xəttindəki əlavə dörd təyyarənin də “Lockheed Martin”in Texas ştatının Fort Uort şəhərində yerləşən müəssisəsində son montaj mərhələsində olduğunu bildirib.
Bütün təyyarələr “Lask” Hava Bazasında yerləşdiriləcək
Təhvil veriləcək bütün F-35A döyüş təyyarələrinin Polşa Hərbi Hava Qüvvələrinin əsas bazalarından biri olan 32-ci Taktiki Hava Bazasında yerləşdirilməsi planlaşdırılır.
Ölkənin mərkəzi hissəsində yerləşən Lask bazası Polşanın qərb bölgələri ilə Belarus və Rusiyanın Kalininqrad bölgəsinə uzanan şərq sərhədi istiqamətində hava əməliyyatları baxımından strateji əhəmiyyət daşıyır.
32 təyyarəlik müqavilə 2020-ci ildə imzalanıb
Polşa 2020-ci ilin yanvarında ABŞ ilə Xarici Hərbi Satış (FMS) proqramı çərçivəsində 32 ədəd F-35A döyüş təyyarəsi üçün təxminən 4,6 milyard dollarlıq müqavilə imzalayıb.
F-35A qısa zolaq və ya şaquli qalxma qabiliyyətinə malik olmayan, klassik qalxma və eniş edə bilən konvensional variant kimi önə çıxır. Aşağı görünmə xüsusiyyətləri, qabaqcıl sensor birləşməsi, radioelektron mübarizə qabiliyyəti və şəbəkə dəstəkli əməliyyat imkanları sayəsində NATO-nun birgə hava əməliyyatı arxitekturasında kritik rol oynayır.
İstehsal qrafiki planlaşdırıldığı kimi irəliləyir
Kosinyak-Kamışın açıqlaması Polşanın F-35 proqramında təhvil qrafikinin nəzərdə tutulduğu şəkildə davam etdiyini göstərir. Bəzi istifadəçi ölkələrdə yaşanan gecikmələrə baxmayaraq, Polşa proqramında indiyədək nəzərəçarpacaq problem yaşanmayıb.
Fort Uort müəssisəsində istehsalı davam edən dörd təyyarənin də sınaq proseslərini tamamladıqdan sonra Atlantik keçidini həyata keçirərək Polşaya təhvil verilməsi gözlənilir.
Rusiya təhdidi modernləşmə prosesini sürətləndirib
Polşanın F-35 proqramına verdiyi əhəmiyyət Avropadakı təhlükəsizlik mühitində yaşanan dəyişikliklərlə birbaşa əlaqələndirilir. Xüsusilə Rusiyanın 2022-ci ildə Ukraynaya qarşı başlatdığı genişmiqyaslı işğal cəhdi Varşava rəhbərliyinin təhdid qavrayışını əhəmiyyətli dərəcədə artırıb.
Polşa Belarusdakı Rusiya hərbi mövcudluğu və Kalininqrad bölgəsində yerləşdirilən inkişaf etmiş hava hücumundan müdafiə sistemləri, “İskəndər” raketləri və dəniz elementləri səbəbindən hava gücünü sürətlə modernləşdirməyə üstünlük verir.
NATO-nun beşinci nəsil hava gücünə inteqrasiya
F-35A-ların xidmətə girməsi ilə Polşa NATO-nun beşinci nəsil döyüş təyyarəsi şəbəkəsinə tam inteqrasiya olunacaq.
Bunun sayəsində Polşa Hərbi Hava Qüvvələri ABŞ, Böyük Britaniya, Niderland, Norveç, Danimarka və İtaliya kimi F-35 istifadəçiləri ilə birgə əməliyyat qabiliyyətini əhəmiyyətli dərəcədə artıracaq.
Polşanın inventarına daxil olacaq F-35A-ların ölkənin hava müdafiə və çəkindirmə qabiliyyətində keyfiyyət baxımından sıçrayış yaratması gözlənilir.
Sevinc Əliyeva
Ordu.az
