Ordu.az xəbər verir ki, 100 mindən çox taktiki sinfə məxsus PUA sisteminin ixracını və Qərbi Afrikada (ECOWAS) daimi logistika dəstək və istehsal infrastrukturunun qurulmasını əhatə edən bu çərçivə müqaviləsi Türkiyənin assimetrik müharibə texnologiyalarındakı gücünü beynəlxalq arenada təsdiqləyib.
Taktiki sahədə istifadə olunan çoxrotorlu və buludaltı PUA-lar sahəsində ixtisaslaşan “DASAL Aviasiya Texnologiyaları” SAHA EXPO 2026 çərçivəsində Nigeriya mərkəzli “NIGUS International Investment Limited” ilə “Çərçivə Təchizat, Yerli Montaj və Şərtli Texnologiya Əməkdaşlığı Müqaviləsi” imzalayıb.
Bu müqavilə təsdiqlənmiş rəsmi son istifadəçilər üçün strateji sistem təchizatı ilə yanaşı, ECOWAS (Qərbi Afrika Dövlətlərinin İqtisadi Birliyi) regionunda daimi müdafiə əməkdaşlığı infrastrukturunun əsasını qoyur.
Müqavilə çərçivəsindəki təchizat paketi əməliyyat sahəsində effektivliyi sübut olunmuş 100 min ədəd DASAL MIKON kamikadze PUA-sı, 200 ədəd DASAL FALCON R556 və 100 ədəd DASAL PUHU yükdaşıyan PUA sistemindən ibarətdir.
Müqavilə yalnız platforma ixracı ilə məhdudlaşmır, eyni zamanda Nigeriyada yerli müdafiə sənayesi imkanlarının formalaşdırılmasını da əhatə edir. NIGUS-un “strateji platforma koordinatoru” kimi çıxış edəcəyi prosesdə mərhələli şəkildə həyata keçiriləcək yerli montaj, sistem inteqrasiyası və genişmiqyaslı texniki xidmət-təmir-yenidənqurma (MRO) infrastrukturu Nigeriya Silahlı Qüvvələrinin fasiləsiz dövri logistika dəstəyi və ən yüksək döyüş hazırlığı səviyyəsinə çatmasını təmin edəcək.
Buludaltı əməliyyatlarda assimetrik zərbə gücü
DASAL-ın baş direktoru Kutay Çağıl Büyüköztürk çərçivə müqaviləsinə dair qiymətləndirməsində bildirib:
“NIGUS ilə imzaladığımız bu müqavilə buludaltı əməliyyatlarda özünü sübut etmiş sistemlərimizin assimetrik müharibədə xərc baxımından effektiv zərbə gücünün beynəlxalq təsdiqidir. Taktiki sahədə əsgərin əməliyyat sürətini artıran kamikadze və yükdaşıyan PUA-larımızı müttəfiq inventarlarına daxil edərkən Afrikada suveren müdafiə texnologiyaları və logistika dəstək bazası qururuq. Məqsədimiz intizamlı inteqrasiya və güzəştsiz texniki dəstək strategiyası ilə Nigeriya Silahlı Qüvvələrinin sahədəki güc multiplikatoru təsirini maksimum səviyyəyə çatdırmaqdır”.
“NIGUS International Investment Limited” şirkətinin baş direktoru və İcra Şurasının sədri Prins Malik Ado-İbrahim isə bildirib:
“Millətimizin gələcəyini təmin etmək uzaqgörən tərəfdaşlıqlar və texnoloji müstəqillik tələb edir. DASAL ilə qurduğumuz bu strateji koordinasiya Nigeriya və geniş ECOWAS regionunun müasir müdafiə təchizatına yanaşmasında paradiqma dəyişikliyidir. Ənənəvi satınalmaların fövqünə keçərək mərhələli yerli montaj, MRO və inteqrasiya imkanlarına fokuslanırıq, beləliklə yüksək texnologiyaya əsaslanan sənaye bazası qururuq. DASAL-ın çoxrotorlu platformalardakı mühəndislik gücünü Nigeriya torpaqlarına daşımaq regional təhlükəsizliyin və uzunmüddətli əməliyyat çevikliyinin təmin edilməsində strateji addımdır”.
Sevinc Əliyeva
Ordu.az
