Ordu.az xəbər verir ki, “Northrop Grumman” tərəfindən paylaşılan yeni video və görüntülər platformanın dizaynı ilə bağlı daha əvvəl görünməmiş detalları üzə çıxarıb və proqramın yetkinləşmə mərhələsinə daxil olduğunu göstərib.
Yeni konsepsiya dizaynı diqqət çəkir
2026-cı il aprelin 20-də yayımlanan görüntülərdə F/A-XX konsepsiyasının quyruqsuz quruluş, geniş gövdə forması, böyük kokpit və geridə yerləşdirilmiş hava girişləri kimi fərqləndirici dizayn elementlərinə malik olduğu görünür. Görüntülərdə yer alan bəzi detalların, xüsusilə daxili silah stansiyaları və daxili həcm quruluşu kimi elementlərin hələ təsdiqlənmiş texniki məlumat olmadığı, mövcud bilgilərin əsasən vizual təhlillərə söykəndiyi qiymətləndirilir.
Aviadaşıyıcı hava gücündə transformasiya hədəflənir
F/A-XX proqramı yalnız F/A-18 “Super Hornet” platformasını əvəz edəcək bir döyüş təyyarəsinin hazırlanmasını deyil, eyni zamanda aviadaşıyıcı vəzifə qruplarının əməliyyat quruluşunu köklü şəkildə dəyişdirməyi hədəfləyir. Yeni platformanın aşağı görünürlük, uzun mənzil, yüksək sağqalma qabiliyyəti və şəbəkə mərkəzli müharibə bacarığı kimi elementləri birlikdə təqdim etməsi nəzərdə tutulur.
Bu çərçivədə F/A-XX-in pilotsuz sistemlərlə inteqrasiya olunmuş şəkildə tapşırıq yerinə yetirə bilən arxitekturanın bir hissəsi olması planlaşdırılır. Xüsusilə MQ-25A “Stingray” pilotsuz yanacaq doldurma təyyarəsi və inkişaf etdirilən “Collaborative Combat Aircraft” konsepsiyası ilə birlikdə işləməsi nəzərdə tutulur.
Podratçı seçimi 2026-cı il avqust ayında
Proqram çərçivəsində “Boeing” və “Northrop Grumman” arasında davam edən rəqabətdə kritik qərar mərhələsinə yaxınlaşılıb. ABŞ Dəniz Əməliyyatları Komandanı admiral Deril Kodl “Sea-Air-Space” simpoziumunda etdiyi açıqlamada yekun podratçı seçiminin 2026-cı il avqust ayında aparılmasının planlaşdırıldığını bildirib.
Kodl proseslə bağlı qiymətləndirməsində qeyd edib: “Donanma yalnız kağız üzərində iddialı olan bir platforma deyil, eyni zamanda təqviminə uyğun şəkildə təhvil verilə biləcək bir həll axtarır”.
Müasir təhdid mühitinə cavab
F/A-XX-in hazırlanması bu günün döyüş mühitində artan təhdidlərə birbaşa cavab xarakteri daşıyır. Qabaqcıl hava hücumundan müdafiə sistemləri, uzun mənzilli zərbə imkanları və pilotsuz platformaların yayılması aviadaşıyıcı vəzifə qruplarının daha uzaq məsafələrdən və daha az risklə əməliyyat aparmasını zəruri edir.
Bu çərçivədə F/A-XX-in yalnız döyüş təyyarəsi deyil, eyni zamanda sensor, komanda və məlumat ötürmə qovşağı kimi fəaliyyət göstərəcək “sistemlər sistemi” yanaşmasının mərkəzində yer alması planlaşdırılır.
Sevinc Əliyeva
Ordu.az
