Ordu.az xəbər verir ki, bu barədə “Associated Press” məlumat yayıb.
“Associated Press” bildirir ki, bu vasitələr İrana qarşı müharibədə əsas rol oynayıb.
ABŞ Prezidenti Donald Trampın 2027-ci il müdafiə xərclərini 1,5 trilyon dollara çatdırmaq planı çərçivəsində Pentaqon pilotsuz uçuş aparatları və əlaqəli texnologiyalar üzrə xərcləri üç dəfə artıraraq 74 milyard dollardan çox səviyyəyə çatdırmaq istəyir. Bundan əlavə, xüsusilə son illərdə ehtiyatları ciddi şəkildə azalmış önləyici raketlər daxil olmaqla, mühüm sursatlara 30 milyard dollardan çox vəsait yatırılması nəzərdə tutulur.
Hərbi rəsmilər bildiriblər ki, bu xərc proqramı Yaxın Şərqdəki münaqişə başlamazdan əvvəl hazırlanıb. Onlar birbaşa müharibənin özü üçün nə qədər əlavə vəsait lazım olacağını müzakirə etməyiblər. Bu məbləğ Ağ Evin gələn büdcə ilində artırmağı planlaşdırdığından daha çox olacaq.
“Bu, bizim daim ehtiyac duyduğumuz sursat tələbatını əks etdirir”, - deyə Pentaqon rəhbərinin müavini vəzifəsini icra edən Culs Herst jurnalistlərə bildirib.
Ən böyük yüklənmə “Patriot” və THAAD hava hücumundan müdafiə sistemlərinin raket önləyicilərinin üzərinə düşür. THAAD orta mənzilli ballistik raketlərin, “Patriot” isə qısa mənzilli raketlərin və təyyarələrin məhv edilməsi üçün nəzərdə tutulub. Lakin hər iki sistem İranın ucuz pilotsuz uçuş aparatlarının vurulması üçün də istifadə olunub.
30 milyard dolların bir hissəsi yüksək dəqiqlikli uzaq mənzilli və orta mənzilli raket sistemlərinə yönəldiləcək. Büdcə layihəsində hərbi pilotsuz uçuş aparatlarına təxminən 54 milyard dollar, onların məhv edilməsi üçün nəzərdə tutulan sistemlərə isə 21 milyard dollar ayrılması planlaşdırılır.
“Pilotsuz uçuş aparatları ilə müharibə müasir döyüş meydanını sürətlə dəyişir. Bu büdcə ABŞ tarixində antidron texnologiyalarına ən böyük sərmayədir”, - deyə Herst bildirib.
Pilotsuz uçuş aparatları və digər pilotsuz vasitələr Ukrayna və İran müharibələrində əsas silah növünə çevrilib və Pentaqonun yüksək vəzifəli rəsmiləri ABŞ-nin həm pilotsuz uçuş aparatlarına, həm də onlara qarşı sistemlərə maliyyələşməni ciddi şəkildə artırmalı olduğunu bildirirlər.
2027-ci il büdcəsi çərçivəsində Pentaqon silahlı qüvvələrin şəxsi heyətini 44 min 500 hərbi qulluqçu artırmağı, ABŞ-Meksika sərhəd əməliyyatlarına 2 milyard dollardan çox vəsait xərcləməyi və 1962-ci ildən bu yana ən böyük gəmiqayırma zavodu sifarişini həyata keçirməyi planlaşdırır.
Sevinc Əliyeva
Ordu.az
