Təyyarənin vurulmasından sonra pilot qısa müddətdə xilas edilsə də, Silah Sistemləri zabitinin (WSO) İran qüvvələrindən qaçaraq təxminən 48 saat ərzində ölkənin dağlıq və çətin relyefli ərazisində gizləndiyi məlum olub. WSO-nun yerinin müəyyən edilməsindən sonra ABŞ Prezidenti Donald Trampın birbaşa göstərişi ilə əməliyyata start verilib.
Gecə saatlarında həyata keçirilən və yüzlərlə xüsusi əməliyyat personalının, həmçinin ABŞ Mərkəzi Kəşfiyyat İdarəsinin (CIA) iştirak etdiyi xilasetmə əməliyyatı zamanı əməliyyatın məxfiliyini qorumaq üçün sosial media üzərindən İran daxilində dezinformasiya xarakterli məzmunlar yayılıb. ABŞ hərbçiləri İranın cənubundakı əməliyyat zonasına göndərilib.
İran ərazisinə eniş edən HC-130J-lər məhv edildi
Xilasetmə əməliyyatı çərçivəsində xüsusi əməliyyatlar üçün modifikasiya edilmiş iki ədəd HC-130J “Combat King II” təyyarəsi şəxsi heyəti təxliyə etmək üçün İran ərazisinə eniş edib.
Lakin qalxış zamanı baş verən kritik texniki nasazlıqlar səbəbindən təyyarələr bölgəni tərk edə bilməyib. İran İnqilab Keşikçiləri Korpusu (SEPAH) ilə baş verən şiddətli toqquşma zamanı təyyarələrdəki həssas avionika sistemlərinin və gizli texnologiyaların İranın əlinə keçməsinin qarşısını almaq məqsədilə həmin iki HC-130J təyyarəsi bölgədəki ABŞ döyüş təyyarələri tərəfindən vurularaq yerində məhv edilib.
MH-6 helikopteri də məhv edildi
Digər tərəfdən əməliyyatda ABŞ tərəfindən HC-130 təyyarələrinə əlavə olaraq MH-6 “Little Bird” helikopterlərindən də aktiv istifadə olunub.
İrana eniş edən 2 ədəd HC-130J “Combat King II” təyyarəsinin “texniki səbəblərdən” ABŞ tərəfindən məhv edildiyi nöqtədə ən azı 1 ədəd MH-6 “Little Bird” helikopterinin də məhv edildiyi müşahidə olunub.
Əməliyyat zonasının Küveytə çox yaxın bir nöqtədə yerləşdiyi məlumdur. Buna görə də MH-6 helikopterinin bölgəyə uçaraq çatması mümkün olduğu kimi, HC-130 təyyarəsi ilə daşınması da ehtimal olunur.
Təxliyə əməliyyatı bölgəyə göndərilən üç yeni hava vasitəsi və intensiv yaxın hava dəstəyi (CAS) altında uğurla tamamlanıb, yaralı olduğu bildirilən WSO təhlükəsiz əraziyə çatdırılıb.
Sevinc Əliyeva
Ordu.az
