Ordu.az xəbər verir ki, “Baykar” şirkətinin baş direktoru Haluk Bayraktar rəsmi “X” hesabı üzərindən etdiyi paylaşımda Türkiyənin hava hücumundan müdafiə konsepsiyasında mühüm rol oynayan yerli önləmə pilotsuz uçuş aparatı “Skydagger” HUNTER-in bütün inkişaf mərhələlərini uğurla tamamlayaraq seriyalı istehsal mərhələsinə keçdiyini ictimaiyyətə açıqlayıb.

Qabaqcıl nişanalma imkanları ilə təchiz olunan “Skydagger” HUNTER saatda 320 km sürətə çata bilən yüksək sürəti sayəsində hava təhdidlərinə qarşı dərhal reaksiya verə bilən önləmə pilotsuz uçuş aparatıdır. Operativ uğuru artırmaq üçün tərkibində gündüz və termal görüntü dəstəkli ikiqat kamera sistemi yerləşdirən platforma buraxılışdan əvvəl radar vasitəsilə hədəf tanıma həyata keçirə bilir. Aşkarlanan hədəflərə 500 metr məsafəyə qədər əl ilə və ya süni zəka dəstəyi ilə kilidlənərək dəqiq izləmə həyata keçirən sistem 500 qramlıq döyüş başlığı ilə hədəfə birbaşa çırpılaraq yüksək məhvetmə gücü təmin edir.

“Sky Dagger”a yüksək səviyyəli səfər

Yaxın günlərdə “Sky Dagger”in fəaliyyətini yerində araşdıran Türkiyə Müdafiə Sənayesi Komitəsinin sədri professor doktor Haluk Görgün nümayiş fəaliyyəti çərçivəsində layihəyə töhfə verən bütün tərəfdaşların nümayəndələrinə təşəkkür edib və Türkiyənin müdafiə sənayesində innovativ, çevik və yüksək texnologiyaya əsaslanan yanaşmanı daha yüksək səviyyəyə çatdıracaq işlərə güclü dəstəyin davam etdiriləcəyini bildirib. Haluk Görgün qeyd edib: “Sky Dagger” ilə yeni bir hekayə yazacağımıza inanırıq”. O, müdafiə sənayesində klassik istehsal yanaşmasını aşan təşəbbüskar və mühəndislik yönümlü şirkətlərin Türkiyənin texnoloji transformasiyasında mühüm rol oynadığını vurğulayıb.

Görgün qeyd edib ki, “Sky Dagger” yalnız mövcud ehtiyaclara cavab verən bir qurum deyil, eyni zamanda dünyadakı texnoloji inkişafları yaxından izləyən, mühəndislik qabiliyyəti və təşəbbüskarlıq ruhu ilə gələcəyə istiqamət verən bir şirkətdir. O, şirkətin ortaya qoyduğu istehsal yanaşmasının müdafiə sənayesinin inkişafı baxımından diqqətəlayiq olduğunu bildirib. Görgün istehsal müəssisələrinə etdiyi səfər zamanı müşahidə etdiyi çevik yanaşmanın və istehsalın hər mərhələsində əks olunan innovativ baxışın Türkiyənin müdafiə sənayesində transformasiya məqsədləri baxımından mühüm nümunə təşkil etdiyini qeyd edib.

Nümayiş etdirilən fəaliyyətin böyük zəhmət, hazırlıq və texniki bacarıq nəticəsində ortaya çıxdığını vurğulayan Görgün belə qiymətləndirmə verib:

“Sky Dagger”in bu gün həyata keçirdiyi əhəmiyyətli fəaliyyətə töhfə verən tərəfdaşlarımızın dəyərli nümayəndələri, hamınızı bu sahədə ölkəmizin inkişafına töhfə verəcək bu tədbirdə göstərdiyiniz dəstəyə görə təbrik edir və təşəkkürümü bildirirəm. Mən istehsal müəssisələrini şəxsən ziyarət etdim. Həqiqətən də həmin ziyarətdən sonra böyük şirkətlərimizin baş direktorları ilə Müdafiə Sənayesi Komitəsi çərçivəsində keçirdiyimiz iclaslarda da qeyd etdiyim kimi, orada gördüyüm çevik yanaşmanı, istehsalın hər mərhələsində tətbiq oluna bilən innovativ baxışı və Allah göstərməsin, bir gün ehtiyac yaranarsa, strateji istehsal müəssisələrinin transformasiyası üçün necə yaxşı nümunə olduğunu hər yerdə izah etməyə çalışıram”.

Görgün əlavə edib ki, sahədə nümayiş etdirilən inam, fədakarlıq və səmimi yanaşma Müdafiə Sənayesi Komitəsi üçün son dərəcə qiymətlidir və uğurla aparılan sınaq və inkişaf fəaliyyətləri Türkiyənin yerli və milli müdafiə texnologiyaları məqsədlərinə mühüm töhfə verir.

Sevinc Əliyeva
Ordu.az