Ordu.az xəbər verir ki, bu barədə “Politico” nəşri yazıb.

Nəşr qeyd edir ki, bununla Tramp aylar boyu bəhs etdiyi hərbi xərclərin iddialı artımını rəsmən təsdiqləyib.

Məlumata görə, Tramp administrasiyası Konqresdəki respublikaçıların bu müdafiə maliyyələşməsinin əhəmiyyətli hissəsini, təxminən 350 milyard dolları partiya uzlaşması proseduru ilə təsdiqləməsini təklif edir. Bu mexanizm Senatda müqaviməti aşmağa və ikipartiyalı danışıqlardan yayınmağa imkan verir.

Ağ Ev hərbi büdcənin görünməmiş dərəcədə artırılmasını tələb etməklə yanaşı, müdafiə ilə bağlı olmayan xərcləri də azaltmağa çalışır. Təklifə əsasən, federal qeyri-hərbi proqramlardan 73 milyard dollar ixtisar edilməlidir.

Administrasiyanın təklif etdiyi ixtisarlar bir sıra federal agentliklərin ekoloji proqramlarına yönəlib. Buraya bərpa olunan enerji texnologiyaları üçün ayrılmış 15 milyard dollarlıq qrantların ləğvi və elektrik avtomobilləri üçün enerji doldurma infrastrukturuna dəstək proqramlarına nəzərdə tutulan 4 milyard dollarlıq vəsait də daxildir.

Sevinc Əliyeva
Ordu.az