Ordu.az xəbər verir ki, Polşanın müdafiə nazirinin müavini Cezari Tomçik yeni buraxılışları elan edərək Varşavanın kosmik proqramındakı sürətli irəliləyişə diqqət çəkib.
Təxminən bir il əvvələ qədər əməliyyat peyki olmayan Polşa son inkişaflarla birlikdə kəşfiyyat, müşahidə və rabitə sahələrində müstəqil kosmik imkan formalaşdırmaq istiqamətində mühüm məsafə qət edir.
Beynəlxalq əməkdaşlıqlar və yerli layihələr
Polşanın kosmik addımı son iki ildə həyata keçirilən və əsasən müdafiə yönümlü olan bir sıra təşəbbüslərə əsaslanır. 2023-cü ilin sentyabrında “Airbus” ilə imzalanan razılaşma çərçivəsində iki hərbi müşahidə peyki tədarük edilərək kəşfiyyat və təhdidlərin aşkarlanması imkanlarının artırılması hədəflənib.
2024-cü ilin dekabrında isə yerli şirkət “Creotech Instruments” ilə dörd mikropeyk tədarükünə dair müqavilə imzalanıb. “HyperSat” platforması əsasında hazırlanan bu peyklərin Yer müşahidəsi üçün optik sensorlarla təchiz olunması və 2027-ci ilə qədər aşağı Günəş-sinxron orbitə yerləşdirilməsi planlaşdırılır.
2025-ci ilin mayında ICEYE ilə genişləndirilən əməkdaşlıq sayəsində sintetik aperturalı radar peyk məlumatlarına çıxış əldə edilərək istənilən hava şəraitində gecə-gündüz müşahidə imkanı təmin olunub. 2025-ci ilin noyabrına olan məlumata görə isə “MikroSAR” proqramı çərçivəsində ICEYE və Polşaya məxsus müdafiə şirkəti PGZ əməkdaşlığı ilə hazırlanan ilk radar təsvirli hərbi peykin buraxılışı üçün hazırlıqlar tamamlanıb.
Bu çoxsəviyyəli yanaşma Polşanın həm yerli istehsal, həm də beynəlxalq tərəfdaşlıqlar vasitəsilə kosmosa əsaslanan müdafiə arxitekturasını sürətlə qurduğunu göstərir.
Sevinc Əliyeva
Ordu.az
