Ordu.az xəbər verir ki, təxminən 5,1 milyard ABŞ dolları dəyərində olan müqavilə yalnız yeni sualtı qayıqların tədarükünü deyil, həm də uzunmüddətli təlim, texniki xidmət, sənaye əməkdaşlığı və texnologiya paylaşımını əhatə edir.
İsveçin Baş naziri Ulf Kristersson bildirib ki, bu müqavilə həm Polşa, həm də İsveç üçün tarixi dönüş nöqtəsidir və Baltik dənizində təhlükəsizliyin gücləndirilməsi ilə NATO-nun çəkindirmə qabiliyyətinə mühüm töhfə verəcək.
İsveçin müdafiə naziri Pol Yonson isə Polşanın A26 platformasını seçməsində bu sualtı qayığın Baltik dənizinin dayaz suları və mürəkkəb dəniz dibi şəraiti üçün xüsusi hazırlanmasının həlledici rol oynadığını vurğulayıb.
Müqaviləyə əsasən, ilk A26 sinfinə məxsus sualtı qayığın 2031-ci ildə Polşa Hərbi Dəniz Qüvvələrinə təhvil verilməsi planlaşdırılır.
Yeni platformalar xidmətə qəbul edilənədək yarana biləcək imkan boşluğunu aradan qaldırmaq məqsədilə İsveç HMS Södermanland sualtı qayığını 2032-ci ilə qədər Polşaya icarəyə verəcək. Bununla Polşa yeni sualtı qayıqlar təhvil alınana qədər sualtı əməliyyatlarını fasiləsiz davam etdirə biləcək.
Bununla yanaşı, Polşa sualtı qayıq heyətlərinin hazırlığı planlaşdırıldığından daha tez başlayacaq. İsveç Hərbi Dəniz Qüvvələrinin həyata keçirəcəyi təlim proqramının ilk mərhələsinə avqust ayında start veriləcək. İsveç rəsmiləri bunun indiyədək həyata keçirdikləri ən genişmiqyaslı sualtı qayıq hazırlığı və dəstək proqramı olacağını bildiriblər.
Müqavilə yalnız platformaların tədarükünü əhatə etmir.
İsveç 2027-2038-ci illər ərzində Polşanın Yeni Tip Sualtı Qayıq (NTS) proqramına dəstək göstərəcək. Bu çərçivədə Polşa HMS “Blekinge” və HMS “Skåne” A26 sualtı qayıqları üzərində aparılan sınaq və yoxlama fəaliyyətlərində iştirak edərək platformanın inkişafı və əməliyyat təcrübəsinin əldə olunması prosesinə qoşulacaq.
Bu yanaşma Polşanın yeni sualtı qayıqları xidmətə qəbul etməzdən əvvəl əməliyyat biliklərini artırmasına və şəxsi heyətini hazırlamasına imkan verəcək.
Müqaviləyə əsasən, “Saab”ın Polşada 114 milyon ABŞ dollarına qədər sərmayə yatırması planlaşdırılır.
Bundan əlavə, “Polska Grupa Zbrojeniowa” (PGZ) ilə “Saab” arasında imzalanmış Anlaşma Memorandumu çərçivəsində ORKA Proqramı üzrə tədarük ediləcək A26 sualtı qayıqlarına texniki xidmət, təmir və istismar dəstəyi göstərəcək birgə müəssisənin yaradılması da nəzərdən keçirilir.
Beləliklə, sualtı qayıqların xidmət müddəti ərzində tələb olunan texniki xidmət və istismar işlərinin əhəmiyyətli hissəsinin Polşada həyata keçirilməsi planlaşdırılır.
“Saab” tərəfindən hazırlanmış A26 (“Blekinge” sinfi) Baltik dənizinin dayaz və mürəkkəb əməliyyat mühiti üçün layihələndirilmiş yeni nəsil dizel-elektrik hücum sualtı qayığı hesab olunur.
Stirling əsaslı Havadan Asılı Olmayan Hərəkətverici Sistem (AIP) sayəsində platforma həftələrlə su səthinə çıxmadan fəaliyyət göstərə bilir və aşağı akustik izi hesabına yüksək gizlilik təmin edir.
Təxminən 66 metr uzunluğa malik olan sualtı qayıq sualtı qayıqlara qarşı mübarizə, suüstü döyüş əməliyyatları, kəşfiyyat, müşahidə, mina döşənməsi və xüsusi təyinatlı əməliyyatlar üçün hazırlanıb.
“Saab” şirkəti A26-nı qabaqcıl stels xüsusiyyətləri, dəniz dibi əməliyyatları qabiliyyəti və rəqəmsal arxitekturası sayəsində dünyanın ilk beşinci nəsil sualtı qayığı kimi təqdim edir.
Sevinc Əliyeva
Ordu.az
