Ordu.az xəbər verir ki, bunu Rusiya xarici işlər nazirinin müavini Mixail Qaluzin Cənubi Qafqazda nəqliyyat kommunikasiyalarının açılmasını nəzərdə tutan, şərti olaraq “Tramp yolu” (Zəngəzur dəhlizi-red.) layihəsini şərh edərkən bildirib.
Qaluzinin sözlərinə görə, Ermənistan və Azərbaycan arasında nəqliyyat və iqtisadi əlaqələrin bərpası məsələləri hələ 2022-2023-cü illərdə Rusiya-Ermənistan-Azərbaycan baş nazir müavinləri səviyyəsində fəaliyyət göstərən üçtərəfli işçi qrupunun çərçivəsində müzakirə olunurdu. Məhz həmin dövrdə iki ölkə arasında dəmir yolu əlaqəsinin bərpası və dəmir yollarının birləşdirilməsi şərtləri razılaşdırılmışdı.
“Bu müzakirələrin və üçtərəfli işçi qrupundakı dialoqun dayanmasında bizim günahımız yoxdur”, - deyə Qaluzin bildirib.
Diplomat qeyd edib ki, əvvəlki formatda işin davam etdirilməsi artıq çətinləşib. Onun sözlərinə görə, Ermənistan gələcək dəmir yolunun nizamnamə kapitalının 49 faizini Amerika tərəfinə vəd edib.
Bununla yanaşı, Qaluzin layihənin perspektivlərinə şübhə ilə yanaşdığını bildirib.
“ABŞ və İsrailin İrana endirdiyi zərbələrdən sonra Tehran çətin ki, özünün şimal sərhədlərində ABŞ-nin mümkün iştirakını müsbət qarşılaya. Bundan başqa, ekspertlərin fikrincə, Çin də Mərkəzi Asiya ilə Avropa arasında nəqliyyat dəhlizinin bir hissəsinin ABŞ-nin nəzarətinə keçməsində maraqlı olmaya bilər”, - deyə o vurğulayıb.
Qaluzin hesab edir ki, əksinə, Rusiya tərəfinin layihədə iştirakı onun həyata keçirilməsinə töhfə verə bilər.
“Çox güman ki, dəmir yolu Azərbaycanla fasiləsiz əlaqəni təmin etmək üçün Rusiya standartına uyğun geniş rels xətti ilə tikilməlidir. Bundan başqa, Ermənistan dəmir yolları “Cənubi Qafqaz Dəmir Yolu” QSC-nin idarəçiliyindədir və bu şirkət “Rusiya Dəmir Yolları”nın törəmə müəssisəsidir. Ermənistan ərazisindən tranzit də Avrasiya İqtisadi Birliyinin normalarına uyğun həyata keçirilməlidir”, - deyə diplomat bildirib.
Qaluzin xatırladıb ki, planlaşdırılan marşrut Ermənistan-Türkiyə və Ermənistan-İran sərhədinin Rusiya sərhədçilərinin erməni həmkarları ilə birlikdə nəzarət etdiyi hissəsindən keçir.
“Bu və ya digər şəkildə Rusiyanın mövqeyi nəzərə alınmalıdır. Avrasiya İqtisadi Birliyinin mövqeyi də nəzərə alınmalıdır. Biz hesab edirik ki, Rusiya tərəfinin iştirakı layihəyə yalnız fayda verərdi”, - deyə Mixail Qaluzin bildirib.
Rusiya xarici işlər nazirinin müavini Ermənistanda Rusiya sərhədçilərinin fəaliyyəti ilə bağlı da danışıb.
Onun sözlərinə görə, Moskva 1992-ci il sazişinin icrasına əsaslanır və həmin sənəd Ermənistan-Türkiyə, eləcə də Ermənistan-İran sərhədlərində Rusiya sərhədçilərinin fəaliyyətini tənzimləyir.
“Biz bu razılaşmaların yenidən nəzərdən keçirilməsi ilə bağlı İrəvandan heç bir siqnal almamışıq”, - deyə Qaluzin vurğulayıb.
O əlavə edib ki, Moskva Gümrüdə yerləşən 102-ci Rusiya hərbi bazası ilə bağlı sazişin yenidən nəzərdən keçirilməsi barədə də Ermənistan tərəfindən heç bir rəsmi siqnal almayıb.
“Ermənistan tərəfi rəsmi səviyyədə bəyan edir ki, İrəvan Gümrüdən Rusiya hərbi bazasının çıxarılması məsələsinə baxmır”, - deyə diplomat bildirib.
Qaluzinin sözlərinə görə, Moskva 102-ci hərbi bazanı həm Ermənistanın, həm də bütövlükdə Cənubi Qafqazın təhlükəsizliyinin əsas elementlərindən biri hesab edir.
O, həmçinin qeyd edib ki, bəzi siyasi qüvvələrin və qərbyönümlü qeyri-hökumət təşkilatlarının Rusiyanın hərbi mövcudluğunu “işğal aləti” kimi təqdim etmək cəhdləri yerli əhali arasında dəstək qazanmır.
Qaluzin Ermənistanın gələcəkdə Avropa İttifaqına mümkün üzvlüyü ilə bağlı sualı cavablandırarkən bildirib ki, bu məsələyə qərarı Ermənistan özü verməlidir.
“Rusiya qüvvədə olan sazişlərə əsaslanır, öz öhdəliklərini yerinə yetirmək niyyətindədir və İrəvandan da eyni yanaşmanı gözləyir”, - deyə Qaluzin fikrini yekunlaşdırıb.
Alpər Mövludoğlu
Ordu.az
