Ordu.az xəbər verir ki, əməkdaşlıq çərçivəsində Avropanın ilk Böyük Uzunmüddətli Uçuş Müddətinə malik Uzaqdan İdarə Olunan Hava Sistemi olan “Eurodrone/U950” bazasında Yaponiyaya məxsus konfiqurasiyanın hazırlanmasının texniki-iqtisadi əsaslandırılması aparılacaq.
Airbus xatırladıb ki, Yaponiya 2023-cü ildən etibarən “Eurodrone” proqramında müşahidəçi ölkə statusuna malikdir və platforma geniş dəniz ərazilərinin nəzarətdə saxlanılmasına ehtiyac duyan ölkələr üçün uyğun həll hesab olunur.
Şirkətin məlumatına görə, uzun müddət havada qala bilməsi və yüksək faydalı yükdaşıma qabiliyyəti sayəsində “Eurodrone” “sonobuoy”a sistemləri və yüngül torpedolar daşıyaraq sualtı qayıqlara qarşı mübarizə əməliyyatlarını yerinə yetirə biləcək.
Beləliklə, platformanın Yaponiyanın mövcud pilotlu dəniz patrul təyyarələrini tamamlayan insansız həll kimi ölkənin dəniz təhlükəsizliyinə töhfə verməsi nəzərdə tutulur.
“Airbus” və “Kawasaki Heavy Industries” Yaponiya üçün hazırlanacaq variantın layihələndirilməsi, hazırlanması və kommersiyalaşdırılması üzrə birgə fəaliyyət göstərəcək.
Tərəflər platformaya Yaponiya istehsalı olan sensorların, tapşırıq sistemlərinin və sursatların inteqrasiyasını, həmçinin istehsal və istismar proseslərində Yaponiya müdafiə sənayesinin rolunu qiymətləndirəcəklər.
“Airbus” bildirib ki, əsas məqsəd Yaponiyanın sistemi satın alacağı təqdirdə “Eurodrone” platformasını hər hansı xarici məhdudiyyətdən asılı olmadan müstəqil şəkildə istismar edə bilməsini təmin etməkdir.
Şirkət əlavə edib ki, Yaponiya üçün hazırlanacaq bu variantdan əldə olunacaq təcrübə gələcəkdə “Eurodrone” platformasının Avropa ölkələri üçün nəzərdə tutulacaq dəniz versiyalarının hazırlanmasına da töhfə verəcək.
Almaniya, Fransa, İtaliya və İspaniyanın birgə həyata keçirdiyi “Eurodrone” proqramı Birgə Silahlanma Əməkdaşlığı Təşkilatı (OCCAR) tərəfindən əlaqələndirilir.
İlk uçuşunun 2029-cu ildə həyata keçirilməsi planlaşdırılan “Eurodrone” kəşfiyyat, müşahidə, hədəf aşkarlanması, erkən xəbərdarlıq, radioelektron kəşfiyyat (SIGINT), dəniz patrulu və sualtı qayıqlara qarşı mübarizə tapşırıqlarında istifadə oluna biləcək.
Təxminən 2,3 ton faydalı yük daşıya bilən platforma 40 saata qədər havada qala bilir və mülki hava məkanında təhlükəsiz fəaliyyət göstərə biləcək şəkildə hazırlanır.
Sevinc Əliyeva
Ordu.az
