Ordu.az xəbər verir ki, şirkət gələcəkdə istehsal fəaliyyətlərini elmi-tədqiqat və layihələndirmə işləri ilə dəstəkləməyi planlaşdırır.

“Tüzün Savunma”nın baş direktoru Reşat Tüzün “Defensehere.com”a açıqlamasında şirkətin yaranmasından bu günə qədər keçdiyi yolu və gələcək planlarını bölüşüb.

O bildirib ki, şirkət qısa müddət ərzində mühüm nailiyyətlər əldə edib.

“Şirkətimiz 2025-ci il aprelin 15-də yaradılıb. Bu il ilk fəaliyyət ilimizi tamamladıq. Bu qədər qısa müddətdə qazandığımız nailiyyətlər sahədə əldə etdiyimiz təcrübənin birbaşa şirkətimizə yansımasının nəticəsidir”, - deyə o qeyd edib.

Reşat Tüzün vurğulayıb ki, müdafiə sənayesində uzun illər mühüm layihələrdə çalışmış təcrübəli heyət formalaşdırılıb və bu təcrübə şirkətin inkişafına ciddi töhfə verib.

Onun sözlərinə görə, şirkət ilk il ərzində mühüm sertifikatlaşdırma mərhələlərindən keçərək müdafiə sənayesi ekosistemində öz yerini tutmağa başlayıb.

“Qısa müddət ərzində, cəmi bir il içində EYDEP təsdiqini aldıq. ASELSAN və ROKETSAN-ın təsdiqlənmiş təchizatçısı olduq. AS9100 və müəssisə təhlükəsizliyi sertifikatı proseslərinə də başlamışıq”, - deyə o bildirib.

Hazırda Ankara şəhərinin İvedik Sənaye Zonasında 1000 kvadratmetrlik sahədə fəaliyyət göstərdiklərini qeyd edən Tüzün gələcək planlardan da danışıb.

“2027-ci il layihəmiz çərçivəsində Başkent Sənaye Zonasında 10 min kvadratmetrlik zavod qurmağı planlaşdırırıq. Bunun üçün torpaq sahəmiz artıq mövcuddur”, - deyə o vurğulayıb.

Şirkətdə təxminən 50 nəfərlik kollektivin çalışdığını bildirən Reşat Tüzün əməkdaşların böyük hissəsinin texniki heyətdən ibarət olduğunu qeyd edib.

O bildirib ki, “Tüzün Savunma” müdafiə elektronikası sahəsində sifarişçilərə tam inteqrasiya olunmuş həllər təqdim edə bilir.

“Şirkətimiz istehsal, sistem inteqrasiyası, sınaq və təsdiqləmə, platforma inteqrasiyası və ilkin layihələndirmə fəaliyyətlərini həyata keçirir. Kablaj, kart istehsalı, elektromexaniki montaj və sınaq imkanlarımız sayəsində bütün bu qabiliyyətləri bir dam altında birləşdirərək müştərilərimizə tam həllər təqdim edə bilirik”, - deyə o bildirib.

Reşat Tüzün qeyd edib ki, elektron kart istehsalı infrastrukturu müdafiə sənayesinin standartlarına uyğun qurulub.

“Şirkətimiz kart istehsalı üçün 25 metrlik inline istehsal xəttinə malikdir. Buraya iki yerləşdirmə maşını, rentgen nəzarət sistemi, yuma maşını, konformal örtük avadanlığı və BGA təmir sistemi daxildir. Bu avadanlıqlar müdafiə sənayesinin ən yüksək tələblərini qarşılamaq imkanına malikdir”, - deyə o bildirib.

Kablaj istehsalı sahəsində də geniş imkanlara malik olduqlarını vurğulayan Tüzün fərqli növ kabellərin istehsalını həyata keçirə bildiklərini deyib.

“36 AWG-dən 0 AWG-yə qədər müxtəlif kabel növlərinin istehsalı üçün infrastruktura sahibik. RF kabel istehsalı və sınaqları, GX kabelləri və kabel dəstlərinə qədər bütün ehtiyacları qarşılaya, həmçinin elektromexaniki montaj baxımından masaüstü sistemlərdən yerüstü platformalara qədər müxtəlif həllər təqdim edə bilirik”, - deyə o qeyd edib.

Şirkətin növbəti hədəfinin layihələndirmə və elmi-tədqiqat fəaliyyətləri olduğunu bildirən baş direktor ilk mərhələdə kablaj layihələndirilməsinə başladıqlarını deyib.

“Layihələndirmə istiqamətində fəaliyyətimizə kablaj layihələndirməsi ilə başlamışıq. Yeni zavoda keçidlə birlikdə avadanlıq, mexanika və proqram təminatı layihələndirməsi sahələrini də inkişaf etdirərək elmi-tədqiqat fəaliyyətlərinə ciddi töhfə verəcəyik”, - deyə o bildirib.

Reşat Tüzün əlavə edib ki, şirkətin büdcəsinin mühüm hissəsi elmi-tədqiqat işlərinə ayrılır və yerliləşdirmə istiqamətində fəal fəaliyyət aparılır.

O vurğulayıb ki, şirkətin inkişaf planı uzunmüddətli perspektiv əsasında hazırlanıb.

“Bu şirkəti qurarkən qarşıdakı bir ili, beş ili və on ili nəzərə alaraq bütün planlarımızı hazırladıq. Hər addımda geriyə baxaraq uğurlarımızı və daha yaxşı edə biləcəyimiz məsələləri qiymətləndirdik. Bu yanaşma bizi bugünkü uğura gətirib çıxardı”, - deyə o bildirib.

Reşat Tüzün çıxışının sonunda şirkətin əsas prinsipini belə ifadə edib: “Heç vaxt ‘artıq məqsədimizə çatmışıq’ demirik və deməyəcəyik”.

Şirkət yaxın dövrdə istehsal imkanlarını daha da artıraraq müdafiə elektronikası və inteqrasiya olunmuş sistemlər sahəsində Türkiyənin yerliləşdirmə hədəflərinə töhfə verməyi qarşısına məqsəd qoyub.


Sevinc Əliyeva
Ordu.az