Ordu.az xəbər verir ki, 2026-cı il iyunun 12-də imzalanan müqavilə çərçivəsində platforma üçün qabaqcıl texnologiyaların hazırlanması və inteqrasiyası üzrə işlər 2031-ci ilin iyun ayınadək davam edəcək.
“Lockheed Martin” şirkətinin törəmə müəssisəsi olan “Sikorsky” tərəfindən həyata keçiriləcək proqram ABŞ Dəniz Piyadaları, ABŞ Hərbi Dəniz Qüvvələri və adı açıqlanmayan xarici müştəri üçün nəzərdə tutulub.
CH-53K “King Stallion” ABŞ Dəniz Piyadalarının inventarında yer alan ən güclü helikopter hesab olunur. Platforma yüksək temperatur və dağlıq şəraitdə 203 kilometr məsafəyə 12,2 ton yük daşımaq qabiliyyətinə malikdir. Helikopterin maksimal xarici yükdaşıma qabiliyyəti isə 16,3 tona çatır.
“King Stallion” 1980-ci illərdən xidmətdə olan CH-53E “Super Stallion” helikopterlərini əvəz etmək üçün hazırlanıb. Yeni platforma sələfi ilə müqayisədə təxminən üç dəfə artıq yükdaşıma qabiliyyəti təqdim edir.
Helikopter hər biri 7 332 at gücü hasil edən üç ədəd GE T408-GE-400 mühərriki ilə təchiz olunub. Tam inteqrasiya edilmiş “fly-by-wire” uçuş idarəetmə sistemi, kompozit əsas rotor pərləri və təkmilləşdirilmiş transmissiya sistemi sayəsində daha yüksək performans və pilot üçün daha az iş yükü təmin edilir.
Müqavilə mühəndislik işlərini, sistem inteqrasiyasını və uçuş sınaqlarını əhatə edir. Proqram çərçivəsində məhsulun təkmilləşdirilməsi, yeni texnologiyaların inteqrasiyası, yoxlama və sertifikatlaşdırma tədbirləri həyata keçiriləcək.
Rəsmilər hazırlanacaq texnologiyaların təfərrüatlarını açıqlamasalar da, işlərin helikopterin performansını, əməliyyat imkanlarını və etibarlılığını artırmağa yönələcəyini bildiriblər.
Müqavilə çərçivəsində işlərin 65,2 faizi ABŞ-nin Konnektikut ştatındakı “Stratford” müəssisəsində aparılacaq. Bundan başqa, Florida, Texas, Pensilvaniya və Minnesota ştatlarındakı müxtəlif obyektlər də layihəyə cəlb olunacaq.
CH-53K parkı böyüməyə davam edir. 2026-cı il etibarilə ABŞ Dəniz Piyadalarının dörd eskadrilyasında bu helikopterlər istismar olunur. HMH-461 ağır helikopter eskadrilyası köhnə CH-53E parkından tam şəkildə CH-53K helikopterlərinə keçən ilk əməliyyat bölməsi olub.
ABŞ Müharibə Nazirliyinin 2026-cı il büdcəsində əlavə 12 ədəd CH-53K helikopterinin alınması üçün vəsait ayrılması platformanın seriyalı istehsal prosesinin sürətləndiyini göstərir.
Yeni modernizasiya müqaviləsi sayəsində yalnız yeni istehsal ediləcək helikopterlərin deyil, hazırda xidmətdə olan CH-53K-ların da təkmilləşdirilmiş imkanlardan faydalanması planlaşdırılır.
Sevinc Əliyeva
Ordu.az
