Ordu.az xəbər verir ki, ölkənin ilk “Boeing E-7 Wedgetail” Havadan Erkən Xəbərdarlıq və İdarəetmə təyyarəsi təhvil verilib.
Təhvil NATO-nun Şimali Atlantika və Şimali Avropada artan qanadlı raket, pilotsuz uçuş aparatı və uzaqmənzilli hücum təhdidləri ilə üzləşdiyi dövrdə baş tutub.
Beləliklə, Birləşmiş Krallıq 2021-ci ildə xidmətdən çıxardığı E-3D “Sentry” AWACS parkından sonra itirdiyi havadan erkən xəbərdarlıq imkanlarını yenidən bərpa etməyə başlayıb.
Bildirilib ki, Birləşmiş Krallıq E-3D “Sentry” platformalarını istismardan çıxardıqdan sonra havadan erkən xəbərdarlıq və döyüş idarəetməsi missiyalarında NATO-nun E-3A AWACS təyyarələrindən asılı vəziyyətə düşmüşdü.
İlk E-7 “Wedgetail” platformasının ölkəyə çatdırılması ilə Birləşmiş Krallıq yenidən müstəqil döyüş idarəetmə infrastrukturu formalaşdırmağa başlayır. Lakin platformanın hələ tam operativ xidmətə daxil olmadığı bildirilib. Hazırda sınaq, qiymətləndirmə və sertifikatlaşdırma fəaliyyətlərinin davam etdiyi qeyd olunub.
“Wedgetail” parkının “Typhoon” döyüş təyyarələri və P-8A “Poseidon” dəniz patrul təyyarələri ilə birlikdə fəaliyyət göstərməsi planlaşdırılır. “Boeing 737” platforması üzərində hazırlanan E-7 “Wedgetail” “Northrop Grumman” istehsalı olan MESA radar sistemi ilə təchiz olunub.
Platformanın klassik E-3 AWACS təyyarələrindəki fırlanan radar günbəzi əvəzinə sabit AESA radar arxitekturasından istifadə etdiyi bildirilib. Bu sistemin fasiləsiz 360 dərəcə hava və dəniz müşahidəsi, uzaqmənzilli hədəf izlənməsi, real vaxt rejimində döyüş idarəetməsi, pilotsuz uçuş aparatları və qanadlı raketlərin aşkarlanması kimi imkanlar təqdim etdiyi qeyd olunub.
Elektron şüa yönləndirmə texnologiyası sayəsində radarın hədəf bölgələrini millisaniyələr ərzində yenidən skan edə bildiyi bildirilib. Bu xüsusiyyətin aşağı radar görünüşünə malik FPV pilotsuz uçuş aparatları, kamikadze PUA-lar və alçaq hündürlükdən yaxınlaşan qanadlı raketlərə qarşı ciddi üstünlük yaratdığı vurğulanıb.
MESA radarının yüksək hündürlükdə 600 kilometrdən artıq hava hədəfi aşkarlama məsafəsinə malik olduğu açıqlanıb.
Radioelektron kəşfiyyat toplama imkanının isə təxminən 850 kilometrə çatdığı qeyd olunub. Platformanın eyni anda həm hava, həm də dəniz müşahidəsi həyata keçirə bildiyi və döyüş təyyarələri, hava hücumundan müdafiə sistemləri ilə dəniz vasitələrini vahid taktiki şəbəkədə birləşdirə bildiyi bildirilib.
Təxminən 41 min fut yüksəklikdə fəaliyyət göstərən platformanın radar üfüqünü genişləndirərək alçaq hündürlüklü təhdidlərə qarşı erkən xəbərdarlıq müddətini artırdığı vurğulanıb. Birləşmiş Krallıq ilkin olaraq 2019-cu ilin martında imzalanan təxminən 1,98 milyard dollarlıq müqavilə çərçivəsində 5 ədəd E-7 “Wedgetail” təyyarəsi almağı planlaşdırırdı.
Lakin 2021-ci ildə qəbul edilən Müdafiə İcmalı çərçivəsində bu say 3 platformaya endirilib. Qeyd olunub ki, texniki xidmət və təlim ehtiyacları nəzərə alındıqda üç təyyarəlik parkda eyni anda yalnız bir E-7 platformasının operativ missiyada istifadə edilə biləcəyi qiymətləndirilir.
Kral Hərbi Hava Qüvvələrinin komandanı Maykl Viqston isə daha əvvəl ehtiyac yaranacağı halda parkın yenidən beş platformaya çatdırıla biləcəyini bildirib.
Sevinc Əliyeva
Ordu.az
