Ordu.az xəbər verir ki, bu barədə Türkiyə KİV-ləri məlumat yayıb.
ASELSAN müdafiə sənayesinin qlobal iştirakçılarını bir araya gətirən SAHA 2026 sərgisinin ilk günündə gələcəyin milli texnologiyalarını təqdim edib. Təqdimat mərasimində milli müdafiə nazirinin müavini Bilal Durdalı, Hərbi Dəniz Qüvvələrinin komandanı admiral Ercüment Tatlıoğlu, ASELSAN-ın baş direktoru Ahmet Akyol və BAYKAR İdarə Heyətinin sədri Selçuk Bayraktar iştirak ediblər. ASELSAN-ın “Mavi Vətən”in yeni zərbə gücləri şüarı ilə təqdim etdiyi KILIÇ Avtonom Kamikadze Sualtı Platforması və TUFAN Yeni Nəsil Kamikadze İnsansız Dəniz Platforması sistemləri gözlənilməz təhdidlərə qarşı çəkindirmə gücü olacaq. Hərbi Dəniz Qüvvələrinin komandanı admiral Tatlıoğlu mərasimdə çıxışı zamanı bildirib:
Admiral Tatlıoğlu: Gücümüzə güc qatırıq
“Üç tərəfi dənizlərlə əhatə olunmuş Türkiyənin mövqeyi güclü Hərbi Dəniz Qüvvələrinə sahib olmağımızı zəruri edir. Biz də hər keçən gün gücümüzü artırırıq. Eyni anda 41 hərbi gəmi inşa edirik. İnsansız dəniz platformaları sahəsində də çox yaxşı səviyyəyə çatmışıq. Bu gün etibarilə ASELSAN-dan Kamikadze İnsansız Dəniz Platformasını və sualtı platformanı təhvil alırıq. Bu vasitələr Hərbi Dəniz Qüvvələrimizin gücünü artıracaq. Başda ASELSAN-ın baş direktoru Ahmet Akyol olmaqla bütün ASELSAN kollektivinə təşəkkür edirəm”.
Çəkindirmə qabiliyyətli məhsullarla etimad yaradırıq
ASELSAN-ın baş direktoru Ahmet Akyol da çıxışında bildirib:
“Bu gün dənizçilik sahəsində mühüm layihələr həyata keçirən bir şirkətik. 50-dən çox sistemimiz müxtəlif platformalarda qəhrəman hərbi dənizçilərimiz üçün xidmət göstərir. Qarşıdakı dövrdə də donanmamızı gücləndirməyə davam edəcəyik. Döyüş meydanının dinamikası dəyişir. Bu dəyişiklik daha xərc baxımından effektiv çəkindirmə sistemlərinin ön plana çıxdığı bir mərhələyə keçidi göstərir. Bu gün iki yeni məhsul ailəmizi təqdim etmək üçün buradayıq. Kamikadze sualtı platforma ailəsini KILIÇ adlandırdıq. Bu, Türkiyənin ilk kamikadze avtonom sualtı platformasıdır. Əslində son dərəcə xərc baxımından effektiv, çəkindirmə xüsusiyyətli bir sistem olaraq donanmamızın, dost və müttəfiqlərimizin inventarına daxil etmək üçün hazırıq. Xüsusilə qeyd etmək istəyirəm ki, tədqiqat və inkişaf prosesləri davam edərkən seriyalı istehsal da planlaşdırılır. KILIÇ Türkiyənin ilk sualtı kamikadze avtonom platforması olaraq xalqımıza xeyirli olsun.
Yeni suüstü kamikadze platformamız TUFAN ağır torpido səviyyəsində döyüş başlığı daşıya bilən, avtonom fəaliyyət göstərə bilən və peyk vasitəsilə idarə olunan kamikadze suüstü platforma olaraq 2027-ci ildə inventara daxil olacaq. Tədqiqat və inkişaf və istehsal proseslərini eyni vaxtda həyata keçiririk. Bu sistemləri xalqımıza təqdim etməyin qürurunu yaşayırıq. Oyunu dəyişən, çəkindirmə qabiliyyətli layihələrə fokuslanırıq. Yeni bir mədəni yanaşma formalaşıb. Bu yanaşmanı zərbə tipli pilotsuz uçuş aparatları ilə Türkiyəyə qazandırdıq və artıq nəticələrini görürük. BAYKAR şirkətinə və dövlətimizə ayrıca təşəkkür edirəm. ASELSAN qarşıdakı dövrdə yüksək çəkindirmə qabiliyyətinə malik məhsullarla xalqımıza etimad verəcək”.
Dənizlərin altındakı iti KILIÇ
Dəniz hədəflərini aşkar etmək və məhv etmək məqsədilə hazırlanmış, insansız, birdəfəlik istifadə üçün nəzərdə tutulan, çox yüngül sinfə məxsus olan KILIÇ 10 aşağı radara görünmə xüsusiyyətinə malik kompakt və hidrodinamik dizaynı ilə hazırlanmış sualtı sistem kimi diqqət çəkir. Asimmetrik dəniz müharibəsi və sualtı və suüstü əməliyyatlar üçün optimallaşdırılan KILIÇ 10 yüksək dəqiqliklə məhv etmə, sürü əməliyyatı qabiliyyəti, kabel ilə idarəetmə, aşağı aşkarlanma kimi üstün xüsusiyyətləri ilə fərqlənir.
KILIÇ məhsul ailəsinə daxil olan KILIÇ 200 isə orta sinfinə məxsus olub, KILIÇ 10 kimi aşağı xərcli, yüksək mənzil və yüksək partlayıcı yükə malik sistemdir. KILIÇ 200 insansız dəniz platformasından buraxılma, inteqrasiya olunmuş döyüş başlığı ilə yüksək dəqiqliklə məhv etmə, sürü əməliyyatı qabiliyyəti, suüstü termal və IR kamera ilə artırılmış tapşırıq mənzili xüsusiyyətləri ilə seçilir.
“Mavi Vətən”də TUFAN
Yüksək partlayıcı döyüş başlığı daşıya bilən TUFAN sürü şəklində fəaliyyət göstərə bilən və qabaqcıl situasiya məlumatlılığı ilə avtonom qabiliyyətlərə malik insansız dəniz platforması kimi diqqət çəkir.
TUFAN suüstü hədəflərlə yanaşı sahil xəttində yerləşən kritik obyektlərin də zərərsizləşdirilməsi üçün istifadə oluna bilər.
Kəşfiyyat, müşahidə və informasiya toplama tapşırıqlarında tək və ya sürü şəklində yerləşdirilə bilən TUFAN asimmetrik hücum formaları və tapşırığa uyğun alt qruplar yaradaraq müxtəlif vəzifələri icra edə bilir. Hərəkətli və sabit maneələrdən avtonom şəkildə yayınma qabiliyyətinə malik sistem görüntü əsaslı hədəf aşkarlama və nişanalma imkanına da malikdir. TUFAN qabaqcıl situasiya məlumatlılığı və avtonom xüsusiyyətləri ilə yanaşı yüksək sürət və manevr qabiliyyəti ilə “Mavi Vətən”də güc artıran amil olacaq. Yüksək partlayıcı döyüş başlığı ilə yanaşı sürü şəklində avtonom hərəkət və tapşırıq icrası həyata keçirə bilən TUFAN görüntü əsaslı hədəf aşkarlama və nişanalma qabiliyyətinə malikdir.
Sevinc Əliyeva
Ordu.az
